ᓇᓗᓇᐃᔭᐅᑎ: ASC ᐊᐅᓪᓚᕐᓂᕐᒧᑦ ᓇᒧᙵᐅᕙᓪᓕᐊᓂᕆᔭᖓ
ᐄᑕᐅᑉ ᓇᒧᙵᐅᕙᓪᓕᐊᓂᕆᔭᖓ
ᑐᙵᓱᒋᑦ ᐄᑕ!
ᐄᑕᖑᔪᖓ, 26-ᓂᒃ ᐅᑭᐅᖃᖅᑐᖓ ᐃᓅᓪᓗᖓ ᐊᕐᓇᐅᓪᓗᖓ. ᓄᓇᓕᕋᓛᕐᒥᐅᑕᐅᒐᒪ 1,300-ᓂᒃ ᐃᓄᓕᖕᒥᒃ. ᒪᒃᑯᒃᑑᑎᓪᓗᖓ, ᐱᕐᕈᓗᐊᕿᓚᐅᖅᓯᒪᒐᒪ ᑐᓄᒃᑯᑦ ᓯᕝᕕᐊᒃᑯᓪᓗ. ᒫᓐᓇᓕ ᖃᐅᑕᒫᑦ ᐃᓅᓯᓐᓂ ᐋᓐᓂᐊᖃᑦᑕᓕᖅᐳᖓ. ᐃᓛᓐᓂᒃᑯᑦ ᐊᑐᖅᐸᒃᐳᖓ ᐊᔭᐅᑉᐱᐊᒥᒃ ᐊᔭᐅᑉᐱᐊᕐᒥᒡᓘᓐᓃᑦ.
ᐃᖃᓗᖕᓄᙵᐅᖃᑦᑕᕋᒪ ᐋᑐᕚᒧᓪᓗ ᐋᓐᓂᐊᕕᓕᐊᖅᓱᖓ ᐃᑲᔪᖅᑕᐅᔭᖅᑐᖅᓱᖓ ᐋᓐᓂᐊᕆᔭᓐᓄᑦ ᐋᓐᓂᕈᑎᒋᔭᕐᓄᓪᓗ ᐱᕐᕈᓗᐊᕿᓚᐅᖅᑎᓪᓗᖓ. ᓄᒃᑕᕐᓂᖅ ᐊᒃᓱᕈᕐᓇᖅᐳᖅ ᐅᕙᓐᓄᑦ. ᐊᓈᓇᒐ ᒪᓕᑦᑎᒋᔪᒪᒐᒃᑯ. ᐅᕙᓐᓂᒃ ᐃᑲᔪᖅᐸᒃᐳᖅ ᐃᓅᖃᑎᖃᑦᑎᐊᖅᐸᒃᑐᓂᓗ.
ᐄᑕ ᐅᖃᖅᑕᖓ
“ᓄᒃᑕᕐᓂᖅ ᐊᒃᓱᕈᕐᓇᖅᑐᒻᒪᕆᐅᕗᖅ ᐊᑭᑐᓪᓗᓂᓗ. ᖃᐅᔨᒪᔪᖓ ᐱᐅᓯᕚᓪᓕᕈᓐᓇᕐᓂᖓᓂᒃ.”
‘ᖃᖓ ᐊᐅᓪᓚᓛᖅᐳᖓ?
ᐃᓛᓐᓂᒃᑯᑦ ᓘᒃᑖᓂᒃ ᑕᑯᔭᕆᐊᖃᓲᖑᕗᖓ ᐃᑲᔪᖅᑕᐅᔪᒪᓪᓗᖓ ᑎᒥᒃᑯᑦ ᐊᒃᓱᕈᕈᑎᒋᔭᓐᓄᑦ. ᓲᖃᐃᒻᒪ ᑭᓱᓕᕆᔨᒻᒪᕇᑦ ᓄᓇᑦᑎᓐᓅᕋᔪᙱᒻᒪᑕ, ᐊᐅᓪᓚᕋᔪᒃᑲᒪ ᐋᓐᓂᐊᕕᓕᐊᖅᑐᖓ.
ᓘᒃᑖᒥᒃ ᑕᑯᔭᕆᐊᖃᕌᖓᒪ ᖃᖓᑦᑕᐅᓯᕆᔨᒃᑯᓐᓄᑦ ᐅᖄᓚᕝᕕᐅᖃᑦᑕᕋᒪ ᑐᓴᖅᑎᑦᑎᔪᒪᓪᓗᑎᒃ ᑕᑯᔭᐅᕝᕕᒃᓴᓐᓂᒃ ᐊᒻᒪ ᖃᖓᑦᑕᐅᑎᒋᓂᐊᖅᑕᓐᓂᒃ. ᐅᑕᖅᑭᓪᓗᖓ ᖃᐅᔨᓂᐊᕐᓗᖓ ᖃᖓᑦᑕᐅᑎᒃᓴᓐᓂᒃ ᓯᕘᕋᓕᕐᓇᖅᐳᖅ. ᖃᐅᔨᒪᙱᑦᑐᖓ ᖃᖓ ᐊᐅᓪᓚᕆᐊᖃᓛᕐᒪᖔᕐᒪ ᐅᕝᕙᓘᓐᓃᑦ ᖃᓄᑎᒋ ᖃᐅᔨᒃᑲᖅᑕᐅᓂᐊᕐᒪᖔᕐᒪ. ᐊᑕᐅᓯᐊᖅᓱᓂ, ᐋᓐᓂᐊᕕᓕᐊᖅᑐᓄᑦ ᖃᖓᑦᑕᐅᑎᓕᕆᔨᑦ ᐅᖃᐅᑎᓚᐅᖅᐹᖓ ᐅᓪᓗᒃᓴᐃᓐᓇᖅ ᐊᐅᓪᓚᕐᓂᐊᕐᓂᕋᖅᓱᓂ.
ᐊᐅᓪᓚᕐᓂᐊᖅᑐᒧᑦ ᒪᓕᒃᑎᒐ ᐊᖏᖅᑕᐅᓚᐅᖅᐸ?
ᐊᑲᐅᓯᕚᓪᓕᓲᖑᕗᖓ ᐊᓈᓇᒐ ᐊᐅᓪᓚᖃᑎᒋᔭᕌᖓᒃᑯ ᒪᓕᒃᑎᒋᓪᓗᒍ. ᑭᒡᒐᖅᑐᐃᔪᓐᓇᕆᕗᖅ ᐅᕙᓐᓂᒃ ᐊᐅᓪᓚᖅᓯᒪᑎᓪᓗᖓ ᐃᑲᔪᖅᐸᒃᑐᓂᖓᓗ ᑐᑭᓯᑎᑦᑎᓂᕐᒥᒃ ᑭᓱᓕᒫᓂᒃ ᐃᓗᐊᖅᓴᖅᑕᐅᔭᖅᑐᖅᓯᒪᑎᓪᓗᖓ. ᐊᒃᓱᕈᓗᐊᖅᑰᔨᓕᕈᒪ ᐋᓐᓂᐊᓕᕌᖓᒪᓘᓐᓃᑦ, ᐊᔪᕐᓇᖅᐸᒃᐳᖅ ᐃᖅᑲᐅᒪᔭᕆᐊᒃᓴᖅ ᑭᓱᓕᒫᓂᒃ ᓘᒃᑖᑉ ᐅᖃᐅᓯᕆᕙᒃᑕᖏᓐᓂᒃ. ᐱᓚᒃᑕᐅᓵᓚᐅᕋᒪ ᐃᓱᒪᔪᓐᓇᙱᓪᓗᖓᓗ ᐊᓈᓇᒐ ᐱᑕᖃᙱᑎᓪᓗᒍ.
ᐄ, ᖃᐅᔨᒪᔪᖓ ᐊᐃᑉᐸᖃᕈᒪ ᐊᑲᐅᓂᖅᐹᖑᔫᒐᓗᐊᖅ ᑭᓯᐊᓂ ᒫᓐᓇᓕᓴᐅᓂᖅᐹᖅ ᐊᐃᑉᐸᖃᕈᒪᓂᕋ ᐋᒡᒑᖅᑕᐅᓚᐅᕐᒪᑦ. ᐋᓐᓂᐊᕕᒃ ᐅᒃᐱᕈᓱᒃᐳᖅ ᓇᖕᒥᓂᖅ ᐊᐅᓪᓚᕈᓐᓇᕐᓂᓐᓂᒃ. ᐊᖏᖃᑎᒋᙱᑕᕋ, ᑭᓯᐊᓂ ᖃᐅᔨᒪᙱᑦᑐᖓ ᑭᓇᒧᑦ ᖃᐅᔨᒋᐊᕆᐊᒃᓴᖅ ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ ᐃᓱᒪᓕᐊᕆᔭᐅᔪᒥᒃ.
ᖃᓄᖅ ᒥᕝᕕᓕᐊᕋᔭᖅᐳᖓ?
ᖃᖓᑕᓲᒃᑯᕕᓕᐊᖅᓱᓂ ᐊᔪᕐᓇᐃᓐᓇᐅᔭᖅᐳᖅ. ᓄᓇᓕᖁᑎᒐ ᑖᒃᓯᖃᙱᒻᒪᑦ, ᐃᓚᒃᑲᓗ ᐊᔪᙱᑦᑐᒥᒃ ᓄᓇᓯᐅᑎᖃᙱᓪᓗᑎᒃ ᒫᓐᓇᐅᔪᖅ. ᐋᓐᓂᐊᕕᓕᐊᕋᐃᒐᒪ, ᐅᓯᔭᐅᔪᓐᓇᐃᓪᓕᐅᖅᑲᕙᒃᑲᒪ. ᖃᖓᑕᓲᒃᑯᕕᒃ 15 ᒥᓂᑦᒥ ᐃᖏᕐᕋᓂᖃᖅᐳᖅ ᐊᖏᕐᕋᓐᓂᑦ. ᕙᐃᔅᐳᒃᑯᑦ ᑕᑯᔭᖅᑐᒐᔪᒃᐳᖓ ᐊᖁᑦᑐᓐᓇᕐᒪᖔᕐᒪ. ᓈᓚᐅᑎᒃᑰᖃᑦᑕᖅᓯᒪᖕᒥᔪᖓᑦᑕᐅᖅ. ᐊᑕᐅᓯᐊᖅᑐᖓ, ᐃᓱᒫᓗᒻᒪᕆᑦᓱᖓ ᖃᖓᑕᓂᐊᕆᐊᑦᓴᖅ, ᐅᖄᓚᓚᐅᖅᓯᒪᒐᒪ ᐸᓖᓯᒃᑯᓐᓄᑦ ᐊᒻᒪᓗ ᐅᓯᔭᐅᑦᓱᖓ ᓄᓇᓯᐅᒻᒧᑦ. ᐋᓐᓂᐊᕕᓕᐊᕆᐊᖃᓕᕌᖓᒪ ᐃᓱᒫᓗᖃᑦᑕᕋᒪ ᑭᖑᕙᕐᓂᐊᕋᓱᒋᓪᓗᖓ.
ᐊᑐᐃᓐᓇᖃᕐᓂᖅ ᐊᒻᒪ ᐃᑲᔪᖅᑕᐅᓂᖅ ᐊᔪᕐᓇᙱᑦᑑᖏᓐᓇᐅᔭᙱᓚᑦ
ᒥᑦᑕᕐᕕᒃ ᓄᓇᑦᑎᓐᓂ ᒥᑭᓗᐊᕐᒪᑦ. ᐃᑲᔪᖅᑕᐅᔪᒪᓲᖑᕗᖓ ᖃᖓᑕᓲᒃᑯᕕᒻᒨᕈᒪᓪᓗᖓ ᑕᐃᓐᓇ ᐊᒃᓴᓗᐊᓄᑦ ᐊᒃᓴᓗᐊᓕᒻᒧᑦ ᐊᐳᑎᒧᑦ. ᑲᐃᓪᓗᐊᕈᑎᒥᒃ ᐊᑐᓲᖑᒐᒪ ᐱᓱᒍᓐᓇᖅᓱᖓᓗ. ᑕᒪᓐᓇ ᑐᑭᖃᖅᐳᖅ ᐱᓱᒍᓐᓇᖅᑐᖓ, ᑭᓯᐊᓂ ᐃᓛᓐᓂᒃᑯᑦ ᐊᑐᕆᐊᖃᖅᐸᒃᐳᖓ ᐊᔭᐅᕈᑎᒥᒃ ᑕᖃᓇᓗᐊᕐᓂᖓᓄᑦ ᐋᓐᓂᕐᓇᓗᐊᕐᓂᖓᓄᑦ. ᒪᔪᕋᐅᑎᒃᑯᑦ ᒪᔪᕋᕈᓐᓇᖅᑐᖓ ᐃᑲᔪᖅᑕᐅᔪᓐᓇᑐᐊᕈᒪ ᐃᑦᑎᕐᕕᓐᓄᑦ ᐊᒻᒪ ᐊᔭᐅᕈᑎᓐᓄᑦ. ᐅᓪᓗᓂᑦ ᐱᓱᒍᓐᓇᙱᒃᑳᖓᒪ, ᐅᖄᓚᖅᑳᕆᐊᖃᖅᐸᒃᐳᖓ ᒥᑦᑕᕐᕕᖕᒧᑦ ᐊᒃᓴᓗᐊᓕᖕᒧᑦ ᐊᒃᓴᓗᐊᓕᖕᒧᑦ ᐃᓯᕋᓱᒡᓗᖓ.
ᖃᖓᑕᓲᖅ ᑎᑭᒻᒪᑦ, ᐱᒡᒐᓇᖅᑐᒻᒪᕆᐅᒻᒪᑦ ᒪᔪᕋᕆᐊᔅᓴᖅ ᓯᕕᑐᔪᒃᑯᑦ, ᑐᐊᑦᑐᒃᑯᑦ ᖃᖓᑕᓲᑉ ᒪᔪᕋᐅᑎᖓᑎᒍᑦ, ᑕᐃᒪᐃᒻᒪᑦ ᐅᐊᓯᖕᑕᓐᒥ ᐃᒃᓯᕙᐅᑕᕐᒥᒃ ᐊᑐᖁᕙᒃᑲ ᐃᑭᓂᐊᕋᒪ. ᐊᑦᑐᖏᖅᓯᒪᕗᖓ ᑐᐊᑦᑐᒧᑦ ᐃᒃᓯᕙᐅᑕᕐᒧᑦ ᕿᓗᐊᖅᓯᒪᓪᓗᖓ ᐊᒻᒪᓗ ᑭᕕᒃᑕᐅᓪᓗᖓ ᖃᖓᑕᓲᒧᑦ ᒪᕐᕉᖕᓄᑦ ᖃᖓᑕᓲᒃᑯᕕᖕᒥ ᐃᖅᑲᓇᐃᔭᖅᑎᓄᑦ. ᐅᐊᓯᖕᑕᓐ ᐃᒃᓯᕙᐅᑕᖓ ᑲᑉᐱᐊᓇᖅᑐᒻᒪᕆᐅᒋᕙᕋ; ᐊᑦᑕᕐᓇᖅᑐᒦᖅᑰᔨᙱᒡᓗᓂ.
ᐊᑦᑐᐃᓐᓇᐅᔪᖃᙱᑦᑐᖅ ᐃᖏᕐᕋᔾᔪᑎᑕᖃᑦᑎᓂᒃ
ᐃᖃᓗᖕᓄᐊᖅᐳᖓ. ᐃᖏᕐᕋᔾᔪᑎᑕᖃᑦᑎᐊᖏᒻᒪᑦ ᐃᖃᓗᖕᓂ, ᐃᑲᔪᖅᑕᐅᔪᒪᔭᕆᐊᖃᓕᖅᑐᖓ ᑐᔪᕐᒥᕕᒻᒨᕈᒪᓪᓗᖓ. ᑖᒃᓯᒃᑰᖅᓱᖓ ᐊᖁᑎᓗ ᐊᐱᕆᓪᓗᒍ ᐃᑲᔪᖁᓪᓗᓂᖓ ᐊᔭᐅᕈᑎᓐᓃᙶᕐᓗᖓ ᑖᒃᓯᒧᐊᕐᓗᖓ. ᐅᖃᐅᑎᓕᖅᐸᕋ ᐊᖁᑎ ᖃᓄᖅ ᐊᒧᓯᔪᓐᓇᕐᒪᖔᑦ ᐊᔭᐅᕈᑎᒐ ᓈᒻᒪᑦᓯᐊᕐᓂᐊᕐᒪᑦ. ᑕᖃᓯᒪᓕᕇᖅᐳᖓ ᓇᒧᙵᐅᕙᓪᓕᐊᓂᕆᔭᓐᓂᒃ.
ᓇᓂ ᐃᓂᖃᖅᐳᖓ? ᐊᑐᐃᓐᓇᐅᕚ?
ᑎᑭᑐᐊᕋᒪ ᑐᔪᒻᒥᕕᒻᒧᑦ, ᓇᓗᓕᖅᓯᒪᔪᖃᕐᒪᑦ. ᐃᓪᓗᕈᓯᖃᓐᖏᒻᒪᑕ ᐅᕙᓐᓄᑦ. ᐅᖄᓚᖃᑦᑕᕋᒪ ᐋᓐᓂᐊᕕᓕᐊᖅᑐᓄᑦ ᖃᖓᑦᑕᐅᑎᓕᕆᔨᓄᑦ ᐊᒻᒪᓗ ᐃᓂᒃᓴᓕᐅᖅᑐᑎᒃ ᑐᔪᕐᒥᕕᒻᒥ. ᑭᓯᐊᓂ, ᑐᔪᕐᒥᕕᒃ ᐅᐸᒐᒃᓴᐅᙱᒡᓗᓂ. ᕿᒪᒋᐊᖃᕐᓂᐊᖅᑕᕋ ᑲᐃᓪᓗᐊᕈᑎᒐ ᓇᑎᕐᒥ ᒪᔪᕋᐅᑎᒃᑰᕐᓗᖓᓗ ᐃᒡᓗᕈᓯᕐᓄᐊᕋᓱᒡᓗᖓ.
ᐃᒡᓗᕈᓯᕐᓄᐊᑕᐃᓐᓇᕋᒪ, ᑕᖃᓯᒪᕗᖓ, ᐋᓐᓂᐊᖅᓱᖓ ᑎᒥᒃᑯᑦ ᐊᒃᓱᕈᕐᓂᕐᒧᑦ, ᐃᓄᑑᙳᖅᑰᔨᓕᖅᓱᖓᓗ. ᒥᑭᑦᑐᖅ ᑐᔪᕐᒥᕕᒃ ᓂᕆᑎᑦᓯᕙᙱᓚᖅ, ᑭᓯᐊᓂ ᑕᖃᓗᐊᓕᕋᒪ ᑐᔪᕐᒥᕕᖕᒥ ᐊᓂᔭᕆᐊᒃᓴᖅ ᓂᕆᔭᒃᓴᖅᓯᐅᕐᓗᖓ. ᓯᓂᖔᕈᒪᓕᖅᐳᖓ.
ᐋᓐᓂᐊᕕᖕᒥ
ᐅᓪᓗᕆᓕᖅᑕᖓ ᑕᑯᔭᐅᕝᕕᒃᓴᕋ. ᐃᖅᑯᒻᒪᓚᐅᖅᑐᖓ ᑳᑦᑐᒻᒪᕆᐅᓪᓗᖓ ᐅᓐᓄᒃ ᓂᕆᓚᐅᙱᓐᓇᒪ ᑕᖃᐃᖅᓯᕆᐊᖅᑐᖅᓱᖓ. ᐋᓐᓂᐊᕕᖕᒥ ᓂᕆᔭᒃᓴᖅᓯᐅᕈᒪᓕᖅᓱᖓ ᐊᑕᐅᓯᐊᑐᐃᓐᓇᕐᓗᖓ ᐊᐅᓪᓚᕆᐊᖃᓕᖅᐳᖓ. ᐊᒻᒧᓚᐅᖅᓱᖓ ᑲᐃᓪᓗᐊᕈᑎᒐ ᐊᐃᓪᓗᒍ, ᑐᙵᓱᒃᑎᑦᑎᔨ ᑖᒃᓯᒧᑦ ᐅᖄᓚᖁᕙᕋ.
ᐋᓐᓂᐊᕕᖕᒥ ᓘᒃᑖᕋ ᑕᑯᕙᕋ. ᐋᓐᓂᐊᕕᒃ ᐃᖃᓗᓐᓂ ᐱᐅᒋᓂᖅᓴᕆᒐᒃᑯ ᑐᓵᔨᖃᕈᒪᔪᓐᓇᕋᒪ, ᐊᑲᐅᓯᕚᓪᓕᕈᑎᒋᕙᕋ. ᐋᑐᕚ ᐱᒡᒐᓇᓐᖏᓂᖅᓴᐅᒻᒪᑦ ᐱᓱᒍᓐᓇᖏᑦᑐᓄᑦ ᐱᓱᒍᓐᓇᖏᑦᑐᓄᑦ, ᑭᓯᐊᓂᓕ ᐃᓛᓐᓂᒃᑯᑦ ᐊᑲᐅᓈᖅᓯᒪᔫᔮᖃᑦᑕᖏᓐᓇᒪ ᖃᓪᓗᓈᓃᓕᕋᐃᒐᒪ.
ᑕᑯᔭᐅᕝᕕᒃᓴᕋ ᐱᔭᕇᕐᒪᑦ, ᐊᖏᕐᕋᓛᕈᒪᑦᑎᐊᓕᖅᐳᖓ. ᑐᔪᕐᒥᕕᓐᓄᑦ ᐅᑎᖅᐳᖓ ᐅᑕᖅᑭᔭᖅᑐᖅᓱᖓ ᖃᖓᑕᓲᕆᓂᐊᖅᑕᓐᓂᒃ. ᓯᓚ ᖃᐅᔨᓴᑦᑎᐊᖅᐸᒃᑐᒍ ᐅᑕᖅᑭᓂᓐᓂ. ᐊᓄᕌᑲᓪᓚᓐᓂᖅᐸᑦ ᐊᔪᖅᓯᓯᒪᑐᐃᓐᓇᕆᐊᖃᕋᒪ ᐃᖃᓗᖕᓂ ᐅᓪᓗᒐᓴᖕᓄᑦ, ᖃᓄᐃᖁᓇᙱᓚᖅ. ᐃᓄᑑᙳᖅᑰᔨᓕᖅᓱᖓ ᐃᓚᒃᑲᓗ ᑭᖑᓂᖃᓕᖅᐸᒃᑲ.
ᐊᖏᕐᕋᐅᕙᓪᓕᐊᓕᖅᓱᖓ
ᒥᑦᑕᕐᕕᖕᒦᑉᐳᖓ ᐃᖃᓗᖕᓂ ᐅᑕᖅᑭᓪᓗᖓ ᖃᖓᑕᓲᒥᒃ ᐊᖏᕐᕋᒧᑦ. ᐊᐱᕆᕙᒃᑲ ᖃᖓᑕᓲᒃᑯᕕᒻᒥ ᐃᖅᑲᓇᐃᔭᖅᑏᑦ ᐃᑲᔪᖅᑕᐅᖁᓪᓗᒋᑦ ᖃᖓᑕᓲᒧᑦ ᐃᑭᒋᐊᔅᓴᖅ. ᖃᖓᑕᓲᒃᑯᕕᒃ ᐱᓱᒡᕕᖃᙱᒻᒪᑦ, ᒪᕐᕉᒃ ᐃᖅᑲᓇᐃᔭᖅᑏᒃ ᐱᖃᑎᒋᕙᒃᑕᒃᑲ ᒥᕝᕕᖕᒧᑦ, ᐱᖃᑖ ᐊᔭᐅᖅᑕᐅᓪᓗᖓ ᐊᔭᐅᕈᑎᓐᓄᑦ. ᒪᕐᕉᒃ ᐃᖅᑲᓇᐃᔭᖅᑏᒃ ᐅᖃᓪᓚᖃᑎᒌᒃᑑᒃ ᑭᓯᐊᓂ ᐃᓕᓴᕆᙱᓪᓗᓂᖓ. ᑕᑯᒃᓴᐅᖅᑰᔨᙱᓪᓗᖓ.
ᐃᖅᑲᓇᐃᔭᖅᑏᑦ ᐊᔭᐅᖅᓯᑎᓪᓗᒋᑦ ᐊᔭᐅᕈᑎᓐᓂᒃ ᐊᔭᐅᕈᑎᒃᑯᑦ ᒪᔪᕋᐅᑎᒃᑯᑦ ᖁᐊᔭᕿᓕᖅᓱᓂ ᐊᒻᒪ ᑐᓗᖅᓯᓪᓗᖓ ᓴᕕᕋᔭᖕᒧᑦ ᑎᒍᒻᒥᕕᖕᒧᑦ — ᐊᐃᒃ! ᐃᖅᑲᓇᐃᔭᖅᑏᑦ ᒪᒥᐊᑉᐳᑦ ᐅᕙᓐᓄᑦ. ᑕᓕᕋ ᓱᙳᔭᖅᑐᖅ ᐃᒃᐱᖕᓇᓗᐊᙱᓪᓗᓂᓗ. ᓂᓪᓚᓱᑦᑐᒻᒪᕆᐅᒻᒪᑦ, ᓂᓪᓚᓱᓐᓂᖓ -30. ᐅᑕᖅᑭᕗᖓ ᒥᕝᕕᖕᒥ 20 ᒥᓂᑦᓯᓂᒃ ᓂᒡᓚᓱᒃᑐᒥ ᐃᖅᑲᓇᐃᔭᖅᑏᑦ ᐅᐊᓯᖕᑕᓐᒥ ᐃᒃᓯᕙᐅᑕᕐᒥᒃ ᐱᕙᒌᔭᐃᓇᓱᖕᓂᖏᓐᓂ.
ᖃᖓᑕᓲᕐᒧᐊᑕᐃᓐᓇᖅᐳᖓ ᐊᖏᕐᕋᐅᕙᓪᓕᐊᓕᖅᓱᖓᓗ. ᑕᖃᔪᖓ, ᐋᓐᓂᐊᓕᖅᓱᖓ, ᖁᕕᐊᓱᑦᑎᐊᖅᓱᖓᓗ ᐊᖏᕐᕋᖅᓯᒪᓕᕋᒪ ᐃᓚᒃᑲᓗ.
ᓇᓗᓇᐃᔭᐅᑎ
