Tautungnaqtut naunaitkutit: ASC Aullaarnikkut Aullaaruti
Eeta Aullaarutaa
Takulugu Eeta!
Uvanga Eeta. 26-nik ukiuqaqtunga Inuinnauyunga. Nunaqaqtunga mikiyumi nunallaami 1,300 inungnik. Inulramiutilunga, aaniqhimayunga qitimnun hilvianunlu. Tadja uluriahuktunga ubluq tamaat inuuhimni. Ilaani atuqpaktunga kaipluarutimik ayaupiamikluuniit.
Tingmivaktunga Iqalungnun Ottawamunlu taaktiliaqtunga ikajuqtaujaamni uluriahuutimnun aannirutimnunlu pijaqqurnirmin. Aullaariami ihumalungnaqpiaktuq uvamnut. Aullarumayunga maamaga munaqtigilugu. Ikayuqtaanga nakuuyuqlu ilauqatigiyaa.
Uqaqtaa Eeta
“Tingminiq unagunaqpiaqtuq akituvallaaqhunilu. Ilihimayunga ihuaqhiyuumiqtaaqtuq.”
Qakugu aullarniaqqik?
Ilaani takuyariaqaqpaktunga taaktinik ikayuqtikhamnik timimni ayuqhautimnik. Taimaali ayuittiaqhimayut qaiyuinmata nunallaamnun, tingmivaktunga daaktiliagiamni.
Taaktimik takujukhauguma, Taaktiliqinahuat Tingmidjutikhainut havagviat hivajarniaqtaanga ilitturipkarlunga qakugu upautivikhamnik hunaniklu tingmidjutikhamnik ihuaqhaqtauniariakhamnik. Utaqqigapku ilitturiyaamni aullaarutikhamnik niriugiliqpaktara. Ilihimangitunga qakugu aniyariaqaqhunga qanuqlu ilituripkaqtauniaqtunga. Atauhirmi, Taaktiliqinahuat Tingmidjutikhait uqautiyaanga tingminiaqtunga aadjikkutaani ubluani.
Tingmidjutiga munaqhaijiga angiqtauva?
Nakuuhivaliayunga maamaga aulaaqatigiblunga munaqtigiblunga. Ikayuqtaaqtaangalu aullaqhimatilunga ikayuqhunga kangiqhiyaaptingni qanuriliurutauyunik taaktiliqiliruma. Ihumaalukpallaaguma uluriahukkumaluunniit, ayurnarniaqtuq itqaumayaami tamainnik taaktip uqaqtainnik. Pilaktauhimayunga qangannuaq, ihumagilimaittunga pilaktauyaami tahamaniingitkuma.
Ilihimayunga munaqtiqariami uvamnut nakuutqiyauyuq uvamnut, kihimi qangannuaq apirhuutiga munaqtikhamik qin’ngiyauyuq. Munaqhitkut ihumayut munarittaaqtatka tingmidjutikhatka uvamnik. Naamagingitara, kihimi naluyunga kimut uqariamni ihuiguhungnikkut ihumaliugutinun.
Qanuqtut milvingmungauniaqqik?
Tingmitiqarvingmungauyaami ayungnaqtuq. Nunallaara taaksiqangittuq, ilatkalu akhaluutiqanggittut hadja. Tingmiyariaqaraangama aanniarnikkut pidjutiqaqtunik, ayuqhaqpaktunga akhaluutituutikhamnik. Tingmitiqarvik 15 minitsinik akhaluutituqtuq iglumnit. Qiniqpaktara Facebook-kut kinaliqaak aquttukhamnik. Uuktuqhimaaqtunga naalautikkut. Atauhiqmi, ihumaalukpiaqtunga tingminnaittumik, hivayaqtatka Paliihimatkut akhaluutikkut agyaqtauplunga. Tingminahuaraangama aanniarnikkut pidjutiqaqtunik, ihumaalukpaktunga tingmivikhamnik uniuqhiniaqtunga.
Piinarialaqininnga Ikayuutikhaqlu Ayurnaqtuq
Tingmitiqarvik nunamni mikiyuq. Apiqhiyunga ikayuqtikhamnik milvingmungaugama aputiqaqqat. Ikhivautaqaqtunga pihuktaaqtungalu. Una naunaiyautaa pihuktaaqtunga, kihimi ilaani atuqtukhauyunga kaipluamik taimaali pihugiami unagunaqpalaaq uvaluuniin ulurianaqmat. Munarittaaqtatka tunmirautit kinaliqaak ikayuruma puukattamnik kaipluarutimniklu. Ubluni pihulimaitkuma, hivayaqtukhauyunga milvingmun hivuani piyaangani mayuraqvik aturiamni kaipluarutiga itiriamni.
Tingmit tikitkaangat, ayungnaqtuq mayurariami hituqakkut, tuattumi mayurautani, taimaali apiqhiyunga atuqlugu Washington ikhivautaq ikiyaami tingminmun. Kiluutaqhimayunga tuattumi ikhivautami taffiqaqtunga kiviktauplunga tingminmut malrungnit milvingmi havaktiinnit. Nalvaaqhimayara Washington ikhivautaa kappianaqtuq; qayangnaqtutut ittuq.
Ingilravikhaittuq
Iqalungmungaqtunga. Ikittut ingilradjutikhat nunalipaujarmi, apiqhijukhaujunga ikajuqtikhamnik itiqtirvimnungaugiamni. Aghaluutituqtunga akhaluuhiqiyi ikayuqublunga anipkaqlunga kaipluarutimnin taaksimun. Uqautiniaqtara akhaluuhiqiyuq qanuq imulugu kaipluarutiga naamagiangani. Unaguqpiaqtunga auladjutimni.
Humi Nayugaqaqqik? Piinarialaqihimava?
Talvunggaugama aanniarviliaqtut nayugaanut, naluqhaliqpaktut. Igluakhaittut uvamnut. Hivayaqtatka Taaktiliqinahuat Tingmidjutikhainut, hiniktarvikhamnik ihuaqhaivaktut. Kihimi hiniktarvik upagiaqangituq. Qimakniaqtara kaipluarutiga natilluami tunmirautikkuuqlunga igluamnungaugiamni.
Igluamnungaugama, unaguhuktunga, uluriahuktunga iqaiyangnikkut aghuurutinun, tuninguhuktungalu. Mikiyuq hiniktaqvik niripkaiyuittuq, unaguqpallaarama aniyaami niqikhaqhiuriamni. Ihumaliuqtunga hinigiamni.
Aanniarvingmi
Ublua upautivikhamnun. Tupakkama kaakpiaqtunga niringitkama ipakhaq unaguiqhiriamni. Ihumaliuqtunga nalvaaqhinahuaqlunga niqikhamnik aanniarvingmi atauhiinnarmik aullarniaqtunga. Anmunggakkama nalvaaqhiplunga kaipluarutimnik, apiriyatka havaktitka hivayaquplugit taxi-mut.
Aaniaqvikmi, takuyara daaktiga. Aanniarvik Iqalungni nakuugilluaqtara uqaqtikhamnik, ihuarijara. Ottawami ayungnaitqiyauyuq aulayaangat kaipluarutimnun, kihimi ilaani ayungnautiqaqpaktunga hivugaaniitkuma.
Upautivikhara inirmat, niriuktunga angilrauyaamni. Utiqtunga hiniktarvimnun nutaqiuqtunga tingmidjutikhamnik. Qun’ngiaqpaktara hila utaqqiplunga. Attautikkut piqhiqniq aulapkaqniaqtara Iqalungni ubluni, nigiuktunga hunaiqhimaluni. Tuninguhuktunga kinguumaliqtatkalu ilatka.
Angilraudjutikhanun
Tingmihiarvingmiitunga Iqalungni nutaqiuqtunga tingmidjutikhamnik nunamnun. Apigiyatka milviup havaktiit ikayuquplugit ikiyaangat tingminmun. Tingmitiqarvik piqangittuq skywalk-mik, taimaa malruuk havaktik ilauqatigiyaanga milvingmut, atauhiq tatiyuq kaipluarutimnik. Malruk havaktuk uqaqatigiikhutik kihimi ilitaringitanga.
Tautungnaiqtutut ilihimayunga.Havaktit tatiqhugu kaipluarutiga anmun mayuraqvikmun, hituaqhuni uvalu tuluqtunga havigalikmun ayapiqvianun — aah! Havaktit mamianaaqtut uvamnun. Talira pautuyaalaqiyuq ulurianaqhiyuqlu. Alappaarnaqpiaqtuq, -30 degrees-mik. Utaqqivaktunga milvingmit 20 minutes-mi alappaarnaqtumi havaktit hanaiyaqtilugit Washington ikhivautamik.
Kinguliqpaamik, tingminmiittunga angilrauliqtungalu. Unaguqtun’nga, uluriahuktun’nga, aliahukpiaqtun’ngalu aiffaalirama ilatkalu.
Kangiqhidjutit
