ᑭᓱᒥᒃ ᒪᓂᒪᑎᑦᑎᕙᖕᒪᖔᑦᑕ: ᕿᒥᕐᕈᓂᖅ ᐱᔨᑦᑎᕋᕐᓂᕆᕙᒃᑕᑦᑎᓐᓂᒃ
ᐱᐅᔪᒻᒪᕆᒃ ᑐᑭᓯᓂᐊᕐᓗᒍ ᐱᓕᕆᐊᕗᑦ ᕿᒥᕐᕈᓗᒋᑦ ᐃᓚᖏᑦ ᐱᔨᑦᑎᕋᕈᑎᒋᕙᒃᑕᕗᑦ. ᑕᕝᕙᓂ ᒪᓕᒃᑕᐅᕙᓪᓕᐊᕙᒃᑐᒥ, ᓇᓂᓯᓂᐊᖅᐳᑎᑦ ᑐᓴᖅᑕᐅᔪᒃᓴᒃᑲᓐᓂᕐᓂᒃ ᐱᔨᑦᑎᕋᕐᓂᕆᕙᒃᑕᑦᑎᓐᓂᒃ NDMS−ᑯᓐᓂ.
ᐱᔨᑦᑎᕋᐅᑎᑦ NDMS−ᑯᓐᓄᑦ
- ᑭᒡᒐᖅᑐᐃᓂᖅ − ᑭᒡᒐᖅᑐᐃᓂᖅ ᑐᙵᕕᐅᕗᖅ ᐱᓕᕆᐊᑦᑎᓐᓂ. ᐅᖃᓪᓚᒍᓐᓇᖅᑐᒍᑦ ᑭᒡᒐᖅᑐᕐᓗᒍ ᐃᓄᒃ (ᓄᓇᕗᒥᐅᖅ), ᐃᑲᔪᕐᓗᒋᑦ ᐃᓄᐃᑦ ᓇᖕᒥᓂᖅ ᑭᒡᒐᖅᑐᕐᓗᒋᑦ, ᐊᔭᐅᕆᓗᑕᓘᓐᓃᑦ ᐊᓯᔾᔩᖁᔨᓗᑕ ᒪᓕᒐᕐᒥᑦ.
- ᐃᖅᑲᓇᐃᔭᕐᓂᕐᒧᑦ ᐃᑲᔪᖅᑐᐃᓂᖅ − ᐊᑐᖅᑕᕗᑦ ᐃᖅᑲᓇᐃᔭᕐᓂᕐᒧᑦ ᐃᑲᔪᖅᑐᐃᓂᕐᒧᑦ ᐊᑕᖐᑦᑎᐊᖅᐳᖅ, ᐃᓚᐅᑎᑦᑎᓪᓗᓂ ᑕᒪᐃᓐᓂᒃ ᐃᖅᑲᓇᐃᔭᖅᑎᑦᑎᔨᒥᒃ ᐃᖅᑲᓇᐃᔭᖅᑎᒥᒡᓗ. ᐃᑲᔪᖃᑦᑕᖅᑐᒍᑦ ᐃᓄᓐᓂᒃ ᐱᔪᓐᓇᖅᓯᖁᓪᓗᒋᑦ ᐃᖅᑲᓇᐃᔭᕐᓂᕐᒧᑦ, ᓲᕐᓗ ᐱᓕᕆᕝᕕᒻᒧᑦ ᑐᕌᖓᔪᓂᒃ ᐱᓕᒻᒪᑦᓴᕐᓂᕐᒥᒃ ᐊᒻᒪᓗ ᐃᖅᑲᓇᐃᔮᒧᑦ ᐊᔪᕆᖅᓱᐃᓂᕐᒥᒃ. ᐊᒻᒪᓗᒃᑲᓐᓂᖅᑕᐅᖅ, ᐱᑎᑦᑎᑐᐃᓐᓇᕆᐊᖃᖅᐳᒍᑦ ᐊᑭᓕᖅᓱᖅᑕᐅᓂᕐᒧᑦ ᐊᑭᒃᖠᒋᐊᖅᑎᑦᑎᓂᕐᒥᒃ ᐊᑭᓕᖅᓱᒐᒃᓴᓂᒡᓗ ᓲᕐᓗ ᐃᓕᓐᓂᐊᕈᑎᓄᑦ ᓄᑕᖅᑲᓄᓪᓗ ᑲᒪᒋᔭᖃᖅᐸᖕᓂᕐᒧᑦ.
- ᐃᓚᓕᐅᔾᔨᓯᒪᓂᒃᑯᑦ ᐱᙳᐊᕐᓂᖅ − ᐅᒃᐱᕆᔭᖃᖅᐳᒍᑦ ᑭᒃᑯᑐᐃᓐᓇᑦᑎᐊᑦ ᐱᕕᒃᓴᖃᕆᐊᖃᕐᓂᖏᓐᓂᒃ ᐃᓚᐅᔪᓐᓇᕐᓂᕐᒥᒃ ᑭᐱᙳᐃᔭᕐᓂᕐᒧᑦ ᓵᓚᖃᕋᓱᒃᐸᖕᓂᕐᒧᓪᓘᓐᓃᑦ ᐱᙳᐊᕐᓂᕆᔭᐅᕙᒃᑐᓄᑦ. ᐃᑲᔪᖅᑐᐃᖃᑦᑕᖅᑐᒍᑦ ᐱᓕᕆᐊᒃᓴᓂᒃ ᐱᕕᖃᖅᑎᑦᑎᔪᓂᒃ ᓄᓇᕗᒻᒥᐅᓂᒃ ᑎᒥᒥᒍᑦ ᐊᔪᕈᑎᓕᖕᓂᒃ ᐃᓚᐅᔪᓐᓇᖁᓪᓗᒋᑦ, ᐃᓚᒋᔭᐅᓪᓗᑎᒃ ᐊᕿᓂᖅ ᐳᐃᔾᔪᕋᕐᓂᕐᓗ.
- ᐃᓅᖃᑎᒌᖕᓂᕐᒧᑦ ᐱᕙᓪᓕᐊᓂᖅ − ᐅᒃᐱᕆᔭᖃᖅᐳᒍᑦ ᑭᒃᑯᑐᐃᓐᓇᑦᑎᐊᑦ ᐱᔪᓐᓇᐅᑎᖃᕐᓂᖏᓐᓂᒃ ᐃᓚᐅᔪᓐᓇᕐᓂᕐᒥᒃ ᓄᓇᓕᖕᓂ ᓄᓇᒋᔭᒥᓂ. ᐃᑲᔪᖅᑐᐃᖃᑦᑕᖅᑐᒍᑦ ᐱᓕᕆᐊᓂᒃ ᖃᐅᔨᒪᓇᑦᑎᐊᖁᓪᓗᒍ ᓄᓇᕗᒻᒥᐅᑦ ᑎᒥᒥᒍᑦ ᐊᔪᕈᑎᓖᑦ ᐃᓚᐅᑎᑕᐅᔪᓐᓇᕐᓗᑎᒃ ᖃᓄᐃᓕᐅᕐᓂᐅᔪᓄᑦ ᓲᕐᓗ ᓄᓇᓕᖕᓂ ᖃᓄᐃᓕᐅᕐᓂᐅᔪᓄᑦ ᐊᒻᒪᓗ ᖁᕕᐊᓲᑎᖃᕐᓂᕐᒧᑦ.
- ᐃᓐᓇᕐᓂᒃ ᐃᑲᔪᖅᑐᐃᓂᖅ − NDMS−ᑯᑦ ᒪᓂᒪᑎᑦᑎᕗᑦ ᐃᓐᓇᐃᑦ ᑲᒪᒋᔭᐅᕙᖕᓂᖏᓐᓄᑦ ᐃᑭᐊᖅᑭᕕᖕᒥᒃ ᐃᑲᔪᕈᒪᓪᓗᒋᑦ ᐃᓐᓇᐃᑦ ᐊᔾᔨᒌᙱᕈᓘᔭᖅᑐᓂᒃ ᐱᔭᕆᐊᖃᖅᑕᖏᓐᓂᒃ, ᐃᓚᒋᔭᐅᓪᓗᑎᒃ ᓂᕆᔭᒃᓴᓕᐅᕐᓂᖅ, ᓇᒧᙵᐅᔾᔭᐅᕙᖕᓂᖅ ᑕᑯᔭᐅᕝᕕᒃᓴᖓᓄᑦ ᐅᑎᒧᓪᓗ, ᐊᐳᑕᐃᔭᐃᓂᖅ, ᐊᖏᕐᕋᕆᔭᐅᔪᓄᑦ ᐳᓛᕆᐊᕐᓂᖅ, ᐱᖃᓐᓇᕆᔭᖃᖅᐸᖕᓂᕐᒧᓪᓗ.
- ᖃᐅᔨᓴᕐᓂᖅ − ᕿᓃᓐᓇᐅᔭᖅᑐᒍᑦ ᓄᑖᓂᒃ ᐊᑐᖅᑕᐅᔪᓐᓇᖅᑐᓂᒃ ᐱᐅᓂᖅᓴᒃᑯᑦ ᐃᑲᔪᖅᑐᐃᔪᒪᓂᕐᒧᑦ ᓄᓇᕗᒻᒥᐅᓂᒃ ᑎᒥᒥᒍᑦ ᐊᔪᕈᑎᓕᖕᓂᒃ. ᑕᒪᓐᓇ ᐃᓚᖃᖅᐳᖅ ᑐᑭᓯᕚᓪᓕᕐᓂᕐᒥᒃ ᐊᑐᕈᓐᓇᕐᓂᕐᒧᑦ ᐊᑐᖅᑕᐅᕙᒃᑐᓂᒃ, ᐃᓄᐃᑦ ᐃᓅᖃᑎᒌᒃᐸᖕᓂᕐᒧᑦ ᐊᓐᓂᕆᔭᖏᓐᓂᒃ, ᐊᕐᓇᐃᑦ/ᐊᖑᑎᑦ ᓇᓕᒧᒌᒃᑎᑕᐅᕙᖕᓂᖏᑦ, ᐊᒃᑐᐊᓂᕆᔭᖏᓪᓗ ᐊᖏᕐᕋᖃᙱᓐᓂᖅ ᐊᔪᕈᑎᓕᖕᓄᓪᓗ.
ᐃᓱᒪᖅᓱᕐᓂᐊᖅᐳᑎᑦ ᑕᑯᔭᖅᑐᕐᓗᒍ ᐱᔨᑦᑎᕋᕐᓂᕐᒧᑦ ᒪᒃᐱᖅᑐᒐᕗᑦ ᖃᐅᔨᒋᐊᒃᑲᓐᓂᕈᒪᒍᕕᑦ.