ᖃᐅᔨᒋᐊᒃᑲᓐᓂᕆᑦ ᐱᔨᑦᑎᕋᕐᓂᕆᕙᒃᑕᑦᑕ ᒥᒃᓵᓄᑦ
ᑭᒡᒐᖅᑐᐃᓂᖅ
NDMS−ᑯᑦ ᑭᒡᒐᖅᑐᐃᕙᒃᐳᑦ ᐃᓄᖕᓄᑦ ᑎᒥᒥᒍᑦ ᐊᔪᕈᑎᓕᖕᓄᑦ, ᐃᓚᒋᔭᐅᓪᓗᑎᒃ ᓄᑕᖅᑲᑦ, ᒪᒃᑯᒃᑐᑦ, ᐃᓐᓇᐃᑦ, ᐊᒻᒪ ᐃᓐᓇᐃᑦ. ᐃᑲᔪᖅᐸᒃᐳᒍᑦ ᐃᓄᖕᓂᒃ ᓇᖕᒥᓂᖅ ᑭᒡᒐᖅᑐᐃᔨᙳᖅᑎᓪᓗᒋᑦ ᐊᒻᒪ ᑭᒡᒐᖅᑐᐃᕙᒃᑐᑕ ᐃᓄᖕᓄᑦ, ᑲᑎᙵᔪᓄᑦ, ᐊᒻᒪ ᐱᓕᕆᔾᔪᓯᕐᓄᑦ.
ᓇᖕᒥᓂᖅ ᑭᒡᒐᖅᑐᐃᓂᖅ
ᓇᖕᒥᓂᖅ−ᑭᒡᒐᖅᑐᐃᓂᖅ ᐱᔪᓐᓇᕐᓂᐅᕗᖅ ᐃᓄᖕᒧᑦ ᑐᑭᓯᓇᑦᑎᐊᖅᑐᒥᒃ ᐅᖃᐅᓯᖃᕈᓐᓇᕐᓗᓂ ᐱᔭᕆᐊᖃᖅᑕᖏᓐᓂᒃ ᐱᔪᓐᓇᐅᑎᖏᓐᓂᒡᓗ. NDMS−ᑯᑦ ᐃᓕᖕᓂᒃ ᐃᑲᔪᖅᑐᐃᕙᒃᐳᑦ ᓇᖕᒥᓂᖅ ᓂᕈᐊᕆᔭᕐᓂᒃ ᓴᐳᔾᔨᓯᒪᓂᕐᒧᓪᓗ ᐱᔪᓐᓇᐅᑎᒋᔭᕐᓂᒃ. ᐱᕚᓪᓕᖅᑎᑦᑎᕙᒃᐳᖅ ᐱᒋᐊᖅᑎᑦᑎᓂᕐᒥᒃ ᐱᓂᐊᕐᓗᓂ ᐱᔭᐅᔭᕆᐊᓕᖕᓂᒃ ᐊᑐᖅᑕᐅᔪᓐᓇᖅᑐᓂᒃ ᐃᑲᔪᖅᑐᐃᓂᕐᒥᒡᓗ.
ᐃᓄᑑᖃᑎᖃᕐᓗᓂ ᑭᒡᒐᖅᑐᖅᑎᐅᓂᖅ
NDMS−ᑯᑦ ᐃᑲᔪᖃᑦᑕᖅᐳᑦ ᐃᓄᖕᓂᒃ ᐱᔪᓐᓇᐅᑎᖏᓐᓂᒃ ᓇᓗᓇᐃᖅᓯᓇᓱᒃᑐᑎᒃ ᑕᒪᐃᓐᓂᒃ ᑭᒡᒐᖅᑐᐃᓂᒃᑯᑦ ᐋᖅᑭᑦᑎᐊᖅᓯᒪᙱᑦᑐᒃᑯᓪᓗ ᑭᒡᒐᖅᑐᐃᓇᓱᖕᓂᒃᑯᑦ.
ᐱᓕᕆᔾᔪᑎᓄᑦ ᑭᒡᒐᖅᑐᐃᓂᖅ
NDMS−ᑯᑦ ᐊᔭᐅᖅᑐᐃᕗᑦ ᐱᓕᕆᔾᔪᓯᕐᓂᒃ ᐊᓯᔾᔨᖅᓯᖁᔨᓪᓗᑎᒃ ᐋᖅᑭᒋᐊᖅᓯᓇᓱᒃᑐᑎᒃ ᐊᑐᐊᒐᕐᓂᒃ ᐊᒻᒪ ᐋᖅᑭᒃᓯᒪᓂᕆᔭᖏᓐᓂᒃ ᐊᒃᑐᐃᓂᕐᓗᒃᑐᓂᒃ ᐃᓄᖕᓂᒃ ᑎᒥᒥᒍᑦ ᐊᔪᕈᑎᓕᖕᓂᒃ.
ᐃᑲᔪᖅᓱᐃᔨᑦ ᑲᑎᙵᔪᑦ ᐊᒻᒪ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᑦ
NDMS−ᑯᑦ ᒫᓐᓇ ᑲᔪᓯᑎᑦᑎᕙᒃᐳᑦ ᑕᖅᑭᑕᒫᑦ ᑲᑎᒪᓂᕐᒥᒃ ᐊᔪᕈᑎᖃᕐᓂᕐᒧᓪᓗ ᑲᑎᒪᔨᕋᓛᓂᒃ ᑕᐅᑐᒐᖃᓪᓗᐊᑕᖅᑐᓂᒃ ᐊᔪᕈᑎᓕᖕᓄᑦ−ᐊᒃᑐᐊᓂᓕᖕᓂᒃ ᐃᓱᒪᒋᔭᒃᓴᓂᒃ. ᑐᙵᓱᒃᑎᑦᑎᕗᒍᑦ ᓄᓇᓕᖕᒥᐅᓂᒃ, ᐃᓄᖕᓂᒃ ᑎᒥᒥᒍᑦ ᐊᔪᕈᑎᓕᖕᓂᒃ ᖃᑕᙳᑎᖏᓐᓂᒡᓗ, ᐊᒻᒪᓗᑦᑕᐅᖅ ᐱᔨᑦᑎᕋᕐᕕᖃᖅᐸᖕᓂᕐᒧᑦ ᑲᑐᔾᔨᖃᑎᒌᓂᒃ, ᐃᓚᐅᖁᓪᓗᒋᑦ. ᑕᒪᒃᑯᐊ ᐅᖃᖃᑎᒌᖕᓂᐅᔪᑦ ᐃᓕᖕᓂᒃ ᐱᕕᒃᓴᖃᖅᑎᑦᑎᕗᑦ ᐊᒥᖅᑳᖃᑎᖃᕈᓐᓇᕐᓂᕐᒥᒃ ᐊᑐᖅᓯᒪᔭᕐᓂᒃ ᐊᔾᔨᒌᙱᕈᓘᔭᖅᑐᓄᑦ ᐱᔾᔪᑕᐅᔪᓄᑦ.
NDMS−ᑯᑦ ᐱᑎᑦᑎᕙᒃᑭᕗᑦ ᐊᔾᔨᒌᙱᕈᓘᔭᖅᑐᓂᒃ ᐱᓕᕆᖃᑎᒌᖕᓂᕐᓂᒃ, ᓲᕐᓗ ᐃᖅᑲᓇᐃᔮᕆᖃᑦᑕᖅᓯᒪᔭᖏᓐᓂᒃ ᐋᖅᑭᒃᓱᐃᕙᓪᓕᐊᓂᕐᒥᒃ, ᐃᓚᓕᐅᔾᔨᓯᒪᑦᑎᐊᕐᓗᓂ ᐃᖅᑲᓇᐃᔭᖅᑎᑦᑎᓂᕐᒥᒃ, ᐊᑐᕈᓐᓇᕐᓂᕐᒧᑦ ᐱᓕᕆᔾᔪᑕᐅᕙᒃᑐᓂᒃ ᓄᑖᙳᖅᐸᓪᓕᐊᔪᓂᒡᓗ, ᐊᒥᓱᓂᒡᓗ ᐊᓯᖏᓐᓂᒃ ᐱᔾᔪᑕᐅᔪᓂᒃ!
ᐅᕙᑦᑎᓐᓄᑦ ᖃᐅᔨᒋᐊᕈᓐᓇᖅᐳᑎᑦ ᐃᓕᑦᑎᒃᑲᓐᓂᕈᒪᒍᕕᑦ ᐅᕝᕙᓘᓐᓃᑦ ᖃᐅᔨᔪᒪᒍᕕᑦ ᖃᓄᖅ ᐃᓚᐅᔪᓐᓇᕐᒪᖔᖅᐱᑦ.
ᓄᓇᕗᒻᒥ ᐋᖅᑭᒋᐊᕈᑎᒃᓴᓄᑦ ᐊᐃᑦᑑᑎᑦ
ᓄᓇᕗᒻᒥ ᐋᖅᑭᒍᑎᒃᓴᓄᑦ ᑐᓂᕐᕈᓯᐊᑦ ᑲᑐᔾᔭᐅᓪᓗᓂ ᐱᒋᐊᖅᑎᑕᐅᓯᒪᔪᖅ ᐃᓚᐅᓪᓗᑎᒃ NDMS, ᕆᒃ ᕼᐋᓐᓴᓐ ᑐᙵᕕᖓᑦ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ. ᑖᓐᓇ ᐊᐃᑦᑑᓯᐊᖅ ᒪᓂᒪᑎᑦᑎᕙᒃᐳᖅ ᑮᓇᐅᔭᑎᒍᑦ ᐃᑲᔪᖅᑐᐃᓂᕐᒥᒃ ᐃᓄᖕᓄᑦ ᑎᒥᒥᒍᑦ ᐊᔪᕈᑎᓕᖕᓄᑦ, ᐃᑲᔪᕐᓗᒋᑦ ᐱᑖᕐᓂᕐᒧᑦ ᐱᖁᑎᓂᒃ ᐱᔨᑦᑎᕋᕐᓂᕆᔭᐅᕙᒃᑐᓂᒡᓘᓐᓃᑦ ᐱᐅᓯᒋᐊᖅᑎᑦᑎᔪᓂᒃ ᐃᓅᓯᕆᔭᐅᔪᓂᒃ ᓄᓇᕗᒻᒥᐅᓄᑦ. ᓄᓇᕗᒻᒥ ᐋᖅᑭᒋᐊᕈᑎᒃᓴᓄᑦ ᐱᓕᕆᐊᖅ ᐱᕚᓪᓕᖅᑎᑦᑎᓇᓱᒃᐳᖅ ᐃᓚᓕᐅᔾᔨᒃᑲᓐᓂᕐᓂᕐᒥᒃ ᐊᔪᙱᑎᑦᑎᓂᒃᑯᑦ ᐃᓄᖕᓂᒃ ᓇᖕᒥᓂᖅᓱᕈᓐᓇᕐᓂᖅᓴᐅᓕᕐᓗᑎᒃ ᖃᐅᑕᒫᑦ ᐱᓕᕆᐊᕆᕙᒃᑕᖏᓐᓂᒃ, ᑕᐃᒪᐃᓐᓂᖓᓄᓪᓗ ᐱᕕᒃᓴᖃᖅᑎᑦᑎᓪᓗᓂ ᐃᓚᐅᔪᓐᓇᕐᓂᖅᓴᐅᓕᕐᓗᑎᒃ ᓄᓇᓕᖏᓐᓂ.
ᑲᑎᓪᓗᒋᑦ $20,000.00 ᓴᓂᕐᕙᒃᑕᐅᓯᒪᕗᑦ ᐃᑲᔫᑕᐅᖁᓪᓗᒋᑦ ᓄᓇᕗᒥᐅᑦ ᑎᒥᒥᒍᑦ ᐊᔪᕈᑎᓕᖕᓄᑦ ᓱᓕ ᐃᑲᔪᖅᑕᐅᙱᖦᖢᑎᒃ. ᑭᖑᓂᑦᑎᓐᓂ, ᑖᓐᓇ ᐱᓕᕆᐊᖑᔪᖅ ᑮᓇᐅᔭᖃᖅᑎᑦᑎᓚᐅᖅᐳᖅ ᓂᐅᕕᕐᓂᕐᒧᑦ ᐱᓱᒍᓐᓇᙱᑦᑐᓄᑦ ᐃᑲᔫᑎᒃᓴᓂᒃ ᓲᕐᓗ ᑲᐃᓪᓗᐊᕈᑎᓂᒃ ᑭᕕᒃᓯᔾᔪᑎᓂᒡᓗ, ᓄᑖᙳᕆᐊᖅᑎᑦᑎᓂᕐᒥᒃ ᐊᖏᕐᕋᕆᔭᐅᔪᓂᒃ ᐱᐅᓯᒋᐊᖅᑎᑦᑎᔪᒪᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ, ᐃᑲᔪᖅᑐᐃᓂᕐᒧᓪᓘᓐᓃᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᓲᕐᓗ ᑕᖃᐃᖅᓯᕐᕕᖃᕐᓂᕐᒧᑦ ᑲᒪᒋᔭᖃᖅᐸᖕᓂᕐᒧᑦ. ᐱᓕᕆᐊᖑᔪᓐᓇᖅᑐᑦ ᐃᓚᖃᖅᐳᑦ ᐱᖁᑎᓂᒃ ᐊᒻᒪ/ᐅᕝᕙᓘᓐᓃᑦ ᐱᔨᑦᑎᕋᐅᑎᓂᒃ ᐱᐅᓯᒋᐊᖅᑎᑦᑎᔪᓂᒃ ᓄᒃᑕᕈᓐᓇᕐᓂᕐᒥᒃ, ᑎᒥᒃᑯᑦ ᐊᑐᕈᓐᓇᕐᓂᕐᒥᒃ, ᐊᒻᒪ ᐃᓅᓯᖃᑦᑎᐊᕐᓂᕐᒥᒃ.
ᐃᖅᑲᓇᐃᔭᕐᓂᕐᒧᑦ ᑲᔪᖏᖅᓴᐃᔨᑦ
ᐃᖅᑲᓇᐃᔮᓄᑦ ᑲᔪᖏᖅᓴᐃᔨᑦ ᐱᐅᔪᒃᑯᑦ ᐊᒃᑐᐃᓂᖃᕈᓐᓇᖅᐳᑦ ᐊᒃᑐᐃᓗᑎᒃ ᖃᓄᖅ ᐃᓄᐃᑦ ᐃᓱᒪᖕᒪᖔᑕ ᐃᒃᐱᒋᔭᖃᕐᒪᖔᑕᓗ ᐊᔪᕈᑎᓕᖕᒥᑦ. ᐊᒥᖅᑳᖃᑎᖃᕐᓂᖅ ᑐᓴᖅᑕᐅᔪᒃᓴᒃᑲᓐᓂᕐᓂᒃ ᑐᕌᖅᑎᑦᑎᕙᒃᐳᖅ ᐊᖏᓂᖅᓴᒥᒃ ᑐᑭᓯᐅᒪᓂᕐᒥᒃ ᐊᑐᖅᓯᒪᔭᖏᓐᓂᒃ ᐃᓄᐃᑦ ᑎᒥᒥᒍᑦ ᐊᔪᕈᑎᓖᑦ, ᐊᖏᒡᓕᒋᐊᖅᑎᑦᑎᓪᓗᓂᓗ ᐃᒪᓐᓇᐅᑐᐃᓐᓇᕆᐊᖃᕐᓂᖓᓂᒃ ᐊᓯᖏᑦ ᐊᓯᔾᔨᖅᓯᓇᔭᕐᓂᖏᓐᓂᒃ (ᐊᓪᓚᐃᑦ ᑲᑐᔾᔨᖃᑎᒌᖏᑦ, 2017). ᐱᙳᐊᖅᑎᓄᑦ ᑲᒪᔨ ᑲᔪᖏᖅᓴᐃᔨᐅᕗᖅ ᐱᖃᓐᓇᕆᔭᐅᓪᓗᓂᓗ, ᐃᑲᔪᖅᐸᒃᑐᓂ ᐃᓄᖕᓂᑦ ᑎᒥᒥᒍᑦ ᐊᔪᕈᑎᓕᖕᓂᑦ ᐋᖅᑭᒃᓱᐃᑎᓪᓗᒋᑦ ᐱᓇᔪᒃᑐᑎᒡᓗ ᓇᖕᒥᓂᖅ ᐃᖅᑲᓇᐃᔭᕐᕕᖕᒥᑦ ᑐᕌᒐᕆᔭᖏᓐᓂᑦ (Bissonnette, 2015). ᐊᑲᐅᙱᓕᐅᕈᑕᐅᔪᓂᒃ ᐋᖅᑭᒃᓯᔨᐅᙱᖔᕐᓗᓂ, ᐱᙳᐊᖅᑎᑦᑎᔨ ᑎᓕᐅᕆᕙᒃᐳᖅ ᐃᓄᖕᓂᒃ ᐃᓱᒪᒃᓴᖅᓯᐅᑦᑎᐊᕐᓂᕐᒥᒃ ᐋᖅᑭᒃᓱᐃᓗᑎᒡᓗ ᓇᖕᒥᓂᖅ ᐋᖅᑭᒍᑎᒃᓴᖏᓐᓂᒃ (Bissonnette, 2015). ᑲᔪᓯᓂᖃᑦᑎᐊᕈᓐᓇᕐᓂᖓ ᐊᔪᕈᓐᓃᖅᓴᖅᑎᑦᑎᔨᐅᑉ ᐃᑲᔪᖅᑐᐃᓂᐊᕐᓗᓂ ᐃᓄᖕᓂᒃ ᐊᔪᕈᑎᓕᖕᓂᒃ ᑐᙵᕕᖃᖅᐸᒃᐳᖅ ᓴᙱᓂᕆᔭᖏᓐᓂᒃ ᐃᓅᖃᑎᒌᖕᓂᖏᑕ ᑐᓴᐅᒪᖃᑎᒌᖕᓂᕐᒧᓪᓗ ᐊᔪᕈᓐᓃᖅᑕᐅᕙᒃᑐᓂᒃ (Dillenburger et al., 2019).
NDMS−ᑯᑦ ᒪᓂᒪᑎᑦᑎᕙᒃᐳᑦ ᐃᖅᑲᓇᐃᔮᓄᑦ ᐊᔪᕆᖅᓲᔾᔨᔨᓂᒃ ᑕᒪᐃᓐᓄᑦ ᐃᖅᑲᓇᐃᔭᖅᑎᑦᑎᔨᓄᑦ ᐃᖅᑲᓇᐃᔭᖅᑎᓄᓪᓗ ᐃᑲᔪᖅᑕᐅᒃᑲᓐᓂᕆᐊᓕᖕᓄᑦ. ᐱᑕᖃᑦᑎᑦᑎᕙᒻᒥᔪᒍᑦ ᐊᑕᖐᑦᑎᐊᖅᑐᒥᒃ ᐃᖅᑲᓇᐃᔮᓄᑦ ᐃᑲᔪᕐᓂᕐᒧᑦ ᐱᓕᕆᐊᒥᒃ ᐃᑲᔪᕐᓂᐊᕐᓗᒋᑦ ᐃᖅᑲᓇᐃᔮᓄᑦ ᐃᑲᔪᖅᑏᑦ ᓄᓇᕗᒻᒥ ᐱᕙᓪᓕᐊᖁᓪᓗᒋᑦ ᐊᔪᙱᑕᖏᑦ ᐊᒻᒪᓗ ᐱᔪᓐᓇᕐᓂᖏᑦ.
ᐱᓕᕆᐊᒃᓴᑦ ᐃᓅᓯᓕᕆᔭᐅᓂᕐᓗ
NDMS−ᑯᑦ ᒪᓂᒪᑎᑦᑎᕙᒃᑭᕗᑦ ᐊᔾᔨᒌᙱᕈᓘᔭᖅᑐᓂᒃ ᐱᓕᕆᐊᒃᓴᓂᒃ ᐃᓅᓯᓕᕆᔭᐅᓂᕐᒥᒡᓗ. ᑎᑎᕋᕐᕕᑦᑎᓐᓄᑦ ᖃᐅᔨᒋᐊᕈᓐᓇᖅᐳᑎᑦ ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᕝᕙᓘᓐᓃᑦ ᑕᑯᒋᐊᕐᓗᒍ ᐱᓕᒻᒪᒃᓴᕐᓂᕐᒧᑦ ᐱᕕᒃᓴᑦ ᑐᑭᓯᒋᐊᒃᑲᓐᓂᕈᒪᒍᕕᑦ.