ᑲᒪᒋᔭᖃᕐᓂᖅ ᐊᓯᔾᔨᕐᓂᐅᔪᓂᒃ ᐱᓕᕆᔨᓪᓚᕆᐅᓂᕐᒧᑦ ᐃᓅᓯᕆᔭᕐᓂ
ᐱᓕᕆᓂᖅ ᐊᓯᔾᔨᖅᐸᓪᓕᐊᖏᓐᓇᐅᔭᖅᐳᖅ. ᓱᖏᐅᑎᓇᓱᒡᓗᓂ ᓄᑖᓄᑦ ᑲᒪᒋᔭᒃᓴᓄᑦ ᐅᕝᕙᓘᓐᓃᑦ ᑲᑐᔾᔨᖃᑎᒌᓄᑦ ᐊᓯᔾᔨᖅᐸᓪᓕᐊᔪᓄᑦ ᓱᖏᐅᑎᔪᓐᓇᕆᐊᖃᕐᓇᖅᐳᖅ, ᐊᒻᒪ ᐊᐅᓚᑦᑎᑦᑎᐊᕐᓂᖅ ᑖᒃᑯᓂᖓ ᐊᓯᔾᔨᕐᓂᐅᔪᓂᒃ ᐃᑲᔪᖅᓱᐃᔪᓐᓇᖅᐳᖅ ᖁᓱᙱᓐᓂᕐᓂᒃ ᐊᒻᒪ ᐱᓕᕆᑦᑎᐊᕈᓐᓇᕐᓂᕐᓂᒃ. ᑖᓐᓇ ᒪᓕᒃᑕᐅᔪᒃᓴᖅ ᒪᓂᒪᑎᑦᑎᕗᖅ ᖃᓄᐃᓕᐅᖅᑕᐅᕙᓪᓕᐊᔪᓐᓇᖅᑐᓂᒃ ᐃᓕᖕᓂᒃ ᐃᑲᔪᕐᓂᐊᖅᑐᓂᒃ ᑲᒪᒋᔭᖃᕐᓂᐊᕐᓗᓂ ᐊᓯᔾᔨᖅᐸᓪᓕᐊᓂᕆᔭᕐᓂᒃ ᐊᔪᕐᓇᙱᑦᑐᒃᑯᑦ.
ᐊᓯᔾᔨᕐᓂᐅᔪᑦ ᐃᖅᑲᓇᐃᔮᖃᕐᓂᕐᒧᑦ
ᐱᔨᑦᓯᕐᓂᖅ − ᐃᖅᑲᓇᐃᔮᖅᑖᕐᓂᖅ ᐱᒻᒪᕆᐅᓛᖑᖃᑕᐅᔪᖅ ᐊᓯᔾᔨᕈᑎᓂᑦ ᐃᓅᓯᕐᓂᑦ, ᐱᕕᖃᖅᑎᑦᓯᒻᒪᑦ ᐃᑲᔪᖅᑐᕐᓂᕐᒥᑦ ᓄᓇᓕᓐᓂᑦ ᐃᓚᓐᓂᓪᓗ. ᐅᕝᕙᐅᑯᐊ ᖃᔅᓯᐊᕐᔪᐃᑦ ᐊᓯᔾᔨᑐᐃᓐᓇᕆᐊᖃᖅᑐᑦ.
ᐱᐅᓯᕆᒐᔪᒃᑕᖓ
ᐃᖅᑲᓇᐃᔮᖅ ᐃᓚᒋᔭᐅᓕᖅᐸᒃᐳᖅ ᒫᓐᓇ ᐊᑐᖅᐸᒃᑕᕐᓄᑦ. ᐋᖅᑭᒃᓱᕆᐊᖃᖅᑕᑎᑦ ᒪᓕᒡᓗᒋᑦ:
- ᓇᓕᐊᖕᓂ ᐅᓪᓗᓂᒃ ᐃᖅᑲᓇᐃᔭᕆᐊᖃᖅᐱᑦ?
- ᖃᔅᓯᓂᒃ ᐃᑲᕐᕋᓂᒃ ᐃᖅᑲᓇᐃᔭᕆᐊᖃᕋᔭᖅᐱᑦ ᖃᐅᑕᒫᑦ?
- ᖃᓄᖅ ᐋᖅᑭᒃᓯᖃᑦᑕᖅᐱᑦ ᓄᖅᑲᖓᓚᐅᑲᖕᓂᐊᕐᓂᕐᓂᒃ ᐅᓪᓗᒃᑯᑦ, (ᓲᕐᓗ ᑳᐱᑐᕐᓇᒥ ᐅᓪᓗᕈᒻᒥᓴᕐᓇᒥᓘᓐᓃᑦ?)
ᐋᖅᑭᒃᓱᖅᑕᐅᒃᑲᓐᓂᕐᓂᖅ
ᓄᑖᒥᒃ ᐃᖅᑲᓇᐃᔮᒥᒃ ᐱᒋᐊᓕᕈᕕᑦ, ᐊᖏᖅᓯᒪᕗᑎᑦ ᐃᖅᑲᓇᐃᔭᕐᓂᐊᕐᓗᑎᑦ ᐃᑲᕐᕋᓂᒃ ᐅᓪᓗᖏᓐᓂᒡᓗ ᐃᖅᑲᓇᐃᔭᖅᑎᑦᑎᔨᐅᑉ ᓂᕆᐅᒋᔭᖏᓐᓂᒃ. ᓱᖏᐅᙵᙱᒃᑯᕕᑦ ᓇᒧᙵᐅᕈᓘᔭᕆᐊᒃᓴᖅ ᓯᕿᙳᔭᒃᑯᑦ, ᐅᐃᒪᓇᕈᓐᓇᖅᐳᖅ. ᑐᑭᖃᖅᐳᖅ ᐅᓪᓗᓕᒫᖅ ᐊᑐᐃᓐᓇᐅᔪᓐᓃᖅᓱᓂ ᐊᓯᖏᓐᓄᑦ ᐱᓕᕆᐊᒃᓴᓄᑦ. ᐱᕙᒌᔭᕆᐊᖃᕐᓂᐊᖅᑕᑎᑦ ᖃᖓᒃᑰᕋᔭᕐᓂᕆᔭᑎᑦ ᐃᓂᖃᖅᑎᑦᑎᔪᒪᓂᕐᒧᑦ ᐱᓕᕆᐊᒃᓴᓂᒃ ᓲᕐᓗ:
- ᓂᕿᑖᕐᓂᖅ
- ᖃᑕᙳᑎᑎᑦ ᐱᖃᓐᓇᕆᔭᑎᓪᓗ ᐱᖃᑎᒋᕙᒡᓗᒋᑦ
- ᑎᒍᐊᕆᔭᐃᑦ ᑲᒪᒋᑦᑎᐊᕐᓗᒍ
- ᐃᖃᓗᒐᓱᖕᓂᖅ ᐊᓯᖏᓐᓂᒡᓗ ᓯᓚᒥ ᐱᓕᕆᓂᖅ
- ᐃᖃᐃᓕᓴᕐᓂᖅ
- ᓯᓂᖕᓂᖅ
ᐱᒻᒪᕆᐅᕗᖅ ᖃᐅᔨᒪᓕᕐᓗᑎᑦ ᖃᓄᖅ ᐃᓚᓕᐅᔾᔨᔪᓐᓇᕐᒪᖔᖅᐱᑦ ᑕᒪᒃᑯᓂᖓ ᐱᓕᕆᐊᒃᓴᓂᒃ ᓇᖕᒥᓂᖅ ᐱᕕᒃᓴᕆᔭᕐᓄᑦ. ᐃᓚᖓᑦ ᐊᔪᕐᓇᓛᖑᖃᑕᐅᔪᖅ ᐱᓕᕆᐊᒃᓴᓂ ᓯᓂᑦᑎᐊᕐᓂᖅ. ᓱᖏᐅᙵᒍᕕᑦ ᓯᓂᖕᓂᕐᒥᒃ ᐃᖅᑯᒻᒪᖅᐸᖕᓂᕐᒥᒡᓗ ᖃᖓᑐᐃᓐᓇᒃᑯᑦ, ᐋᖅᑭᒋᐊᖅᓯᓂᖅ ᓯᓂᖕᓂᕆᕙᒃᑕᕐᓂᒃ ᐊᔪᕐᓇᑐᐃᓐᓇᕆᐊᓕᒃ ᐱᒋᐊᓕᓵᖅᑎᓪᓗᒍ. ᑭᓯᐊᓂ, ᐱᔭᕆᐊᖃᒻᒪᕆᒃᑐᖅ!
ᐋᖅᑭᒃᓱᐃᕙᒡᓗᓂ ᐱᕙᒌᔭᖅᐸᒡᓗᓂᓗ ᓇᖕᒥᓂᖅ ᐃᓂᒃᓴᓕᐅᖅᑕᐅᔪᓂᒃ
ᐃᓚᖏᑦ ᐃᓄᐃᑦ ᑲᒪᒋᔭᒃᓴᖃᖅᐳᑦ ᓲᕐᓗ ᓄᑲᖅᓯᕐᒥᒃ ᑲᒪᒋᔭᖃᕐᓂᕐᒥᒃ ᐅᕝᕙᓘᓐᓃᑦ ᓂᕆᔭᒃᓴᓂᒃ ᐸᔪᖅᓯᕙᒃᑐᓂ ᐃᓐᓇᕆᔭᐅᔪᓄᑦ. ᑕᒪᒃᑯᓂᖓ ᑲᒪᒋᔭᒃᓴᖃᕈᕕᑦ ᐃᖅᑲᓇᐃᔮᖃᕐᓗᑎᓪᓗ, ᐊᒃᓱᕈᕐᓇᕈᓐᓇᖅᐳᖅ. ᐱᒋᐊᓕᖅᑎᓪᓗᓂ, ᐊᔪᕐᓇᖅᑰᔨᔪᖅ, ᑭᓯᐊᓂ ᐊᔪᕐᓇᙱᑦᑐᖅ! ᑕᒪᓐᓇ ᕿᒥᕐᕈᑦᑎᐊᒃᑲᓐᓂᕐᓂᐊᖅᐸᕗᑦ ᐅᐊᑦᑎᐊᕈᒃᑲᓐᓂᖅ ᐅᖃᐅᓯᕆᔭᑦᑎᓐᓂ.
ᓇᖕᒥᓂᖅ ᐱᕕᒃᓴᖃᙱᓐᓂᖅᓴᐅᓕᕐᓗᓂ
ᐃᖅᑲᓇᐃᔮᖅᑖᕐᓂᖅ ᐃᓛᓐᓂᒃᑯᑦ ᐃᒃᐱᒋᔭᖃᕐᓇᖅᐳᖅ ᓇᖕᒥᓂᖅ ᐱᕕᒃᓴᒥᒃ ᐊᓯᐅᔨᓂᕐᒥᒃ. ᑕᒪᓐᓇ ᓇᖕᒥᓂᖅ ᐱᕕᒃᓴᕆᔭᐃᑦ ᐊᑑᑎᖃᕐᓂᖅᓴᐅᕗᖅ. ᐊᓕᐊᓇᐃᒋᑦᑎᐊᕐᓗᒍ ᐊᑐᕐᓗᒍᓗ ᐃᒃᐱᒋᔭᕐᓄᑦ ᐃᖅᑲᓇᐃᔭᙱᓕᕌᖓᕕᑦ, ᑕᖃᐃᖅᓯᖅᐸᒡᓗᓯᓗ!
ᐃᖅᑲᓇᐃᔭᖃᑎᒥᓂᒃ ᐱᖃᑎᖃᕐᓂᖅᓴᐅᓕᕐᓗᓂ
ᐃᖅᑲᓇᐃᔮᖅ ᐃᓅᖃᑎᖃᐃᓐᓇᕆᐊᖃᕋᔪᒃᑐᖅ, ᑭᓯᐊᓂ ᐊᔾᔨᒋᙱᑦᑎᐊᖅᑕᖓ ᐱᖃᓐᓇᕆᔭᕐᓂ ᖃᑕᙳᑎᖕᓂᓗ. ᐃᖅᑲᓇᐃᔭᕐᕕᖕᒥᑦ, ᐅᖃᖃᑎᒌᖕᓂᐅᔪᑦ ᐱᓕᕆᔨᒻᒪᕆᐅᕗᑦ, ᖁᕝᕙᓯᖕᓂᖃᕋᔪᑎᒡᓗ, ᓲᕐᓗ ᐃᖅᑲᓇᐃᔭᖅᑎᑦᑎᔨ/ᐃᖅᑲᓇᐃᔭᖅᑎ ᐅᕝᕙᓘᓐᓃᑦ ᐃᖅᑲᓇᐃᔭᖃᑎᖓ/ᐃᖅᑲᓇᐃᔭᖃᑎᖓ. ᐱᒻᒪᕆᐅᕗᖅ ᑐᑭᓯᐅᒪᓗᓂ ᖃᓄᖅ ᑐᓴᐅᒪᖃᑎᒌᖕᓂᖅ ᐊᑐᖅᑕᐅᓲᖑᖕᒪᖔᑦ ᐃᖅᑲᓇᐃᔭᕐᕕᖕᓂ ᖃᓄᕐᓗ ᓂᕆᐅᒋᔭᐅᖕᒪᖔᖅᐱᑦ ᐱᓕᕆᖃᑎᖃᕐᓂᕐᒥᒃ ᐊᖓᔪᖅᑳᕐᓂᒃ ᐃᖅᑲᓇᐃᔭᖃᑎᖕᓂᓪᓗ.
ᓱᖏᐅᑎᕙᓪᓕᐊᓂᖅ “ᖃᐅᑕᒫᖅᓯᐅᑎᒥᒃ”
ᓱᖏᐅᙵᑐᐃᓐᓇᕆᐊᖃᖅᐳᑎᑦ ᐃᓕᖕᓂᒃ ‘ᒫᓐᓇ ᐃᖅᑲᓇᐃᔭᙱᑦᑐᖓ.’ ᐊᑯᓂᑲᓪᓚᒃ ᓱᖏᐅᑎᓇᓱᒍᓐᓇᖅᐳᑎᑦ ᓄᑖᒧᑦ ᓴᙱᓂᖅᑖᓵᖅᑐᒧᑦ ᐃᓕᖕᓄᑦ. ᖃᓄᖅ ᑖᒃᑯᐊ ᐅᖃᐅᓯᐅᔪᑦ ᐊᒃᑐᐃᓲᖑᕙᑦ ᐃᒃᐱᒋᔭᕐᓂᒃ?
- ᑲᒪᑦᑎᐊᓲᖑᒐᒪ.
- ᐱᓕᕆᔨᒻᒪᕆᐅᕗᖓ.
- ᐱᕚᓪᓕᕈᓐᓇᑦᑎᐊᖅᑐᖓ ᐃᖅᑲᓇᐃᔮᓐᓂᒃ.
- ᐃᓅᒐᒪ ᑮᓇᐅᔭᓕᐅᖅᐸᒃᑐᖓ.
ᖃᓄᐃᒻᒪᑦ ᐊᓯᔾᔨᕐᓂᖅ ᐊᒃᓱᕈᕐᓇᖅᓯᕙᒃᐸ?
ᓂᕆᐅᓇᙱᑦᑐᖅ
ᓄᑖᒥᒃ ᐃᖅᑲᓇᐃᔮᒥᒃ ᐱᒋᐊᕐᓗᓂ ᓇᓗᓇᕈᓐᓇᖅᐳᖅ. ᐃᖅᑲᓇᐃᔮᖅ ᐊᓕᐊᓇᐃᒋᓂᐊᖅᐱᐅᒃ? ᐃᖅᑲᓇᐃᔭᖃᑎᑎᑦ ᐱᖃᑎᒌᑦᑎᐊᖃᑦᑕᕐᓂᐊᖅᐱᓰ? ᐱᓕᕆᖃᑎᖃᕆᐊᖃᕐᓂᐊᖅᐲᑦ ᖃᐅᔨᒪᙱᑕᕐᓂᒃ ᓂᐅᕕᖅᐸᒃᑐᓂᒃ? ᑕᖃᓯᒪᓂᐊᖅᐲᑦ ᐅᓪᓘᑉ ᓄᙳᐊᓂ? ᑲᒪᒋᔭᕆᐊᖃᖅᑕᓕᒫᑎᑦ ᐱᐊᓂᒍᓐᓇᕐᓂᐊᖅᐱᒌᑦ?
ᖃᓄᐃᙱᑦᑐᖅ ᐊᐱᖅᑯᑎᒃᓴᖃᕐᓗᓂ ᓇᓗᓈᕿᔪᖃᖅᑎᓪᓗᒍ. ᑕᒪᓐᓇ ᓇᖕᒥᓂᖅ ᐊᒃᓱᕈᕐᓇᕈᓐᓇᖅᐳᖅ, ᑐᑭᓯᐅᒪᓂᕐᓗ ᑭᓱᑦ ᐊᒃᓱᕈᕐᓇᖅᓯᑎᑦᑎᕙᖕᒪᖔᑕ ᓴᙱᓂᖅᑖᖅᑎᑦᑎᔪᓐᓇᖅᐳᖅ.
ᑲᑉᐱᐊᓱᖕᓂᖅ ᓵᓚᐅᔭᕆᐊᒃᓴᖅ
ᓄᑖᒥᒃ ᐃᖅᑲᓇᐃᔮᒥᒃ ᐱᒋᐊᕐᓗᓂ ᐊᑐᙱᑦᑕᕆᐊᖃᕐᓇᖅᐳᖅ ᐃᓚᖏᓐᓂᒃ ᐃᓱᒪᖅᓱᕐᓇᕐᓂᕐᓂᒃ, ᐊᔪᕐᓇᕐᓂᖅᓴᐅᓕᕈᓐᓇᖅᖢᓂ ᐱᖃᓐᓇᕆᔭᕐᓂ ᑲᑎᙵᖃᑎᖃᕆᐊᒃᓴᖅ ᐊᒻᒪ ᖁᕕᐊᓇᖅᑐᓂᒃ ᐱᓕᕆᐊᒃᓴᓂᒃ ᐃᓚᐅᔪᓐᓇᑐᐃᓐᓇᕆᐊᙱᑦᑐᑎᑦ.
ᐃᒃᐱᒋᔭᖃᕐᓂᖅ ᐊᓯᐅᔨᓂᕐᒥᒃ ᐃᓅᖃᑎᖃᙱᓐᓂᖅᓴᐅᓕᕌᖓᑦᑕ ᐃᓄᖕᓂᒃ ᖃᓂᒋᕙᓚᐅᖅᑕᑦᑎᓐᓂᒃ ᖃᓄᐃᙱᑦᑐᖅ.
ᐃᓕᖅᑯᓯᕆᒐᔪᒃᑕᖓ
ᑖᔅᓱᒥᖓᔅᓴᐃᓐᓇᖅ ᐊᑐᖅᐸᒃᑕᑦᑎᓐᓂᒃ ᒪᓕᓕᕌᖓᑦᑕ ᖃᐅᑕᒫᑦ, ᓱᖏᐅᙵᓇᖅᓯᕙᒃᐳᖅ ᐃᓗᐊᖅᓯᕚᓪᓕᕐᓇᖅᓱᓂᓗ. ᓱᖏᐅᑎᕙᓪᓕᐊᕙᒃᑲᑦᑕ ᖃᐅᑕᒫᑦ ᐊᑐᖅᐸᒃᑕᑦᑎᓐᓂᒃ. ᓄᑖᒥᒃ ᐊᑐᖅᓯᕙᓪᓕᐊᓂᖅ ᐃᒪᓐᓇᐅᒐᔪᒃᐸᒃᐳᖅ, ᐱᓇᓱᐊᕈᓯᕐᓄᑦ ᐱᖓᓱᓄᑦ ᑲᔪᓰᓐᓇᕐᓗᓂ ᐊᔪᕈᓐᓃᖅᓴᕐᓂᕐᒥᒃ ᓄᑖᒥᒃ ᐱᓕᕆᐊᒃᓴᒥᒃ.
ᑖᔅᓱᒥᖓᔅᓴᐃᓐᓇᖅ ᐊᑐᖅᐸᒃᑕᑦᑎᓐᓂᒃ ᒪᓕᓕᕌᖓᑦᑕ ᖃᐅᑕᒫᑦ, ᓱᖏᐅᙵᓇᖅᓯᕙᒃᐳᖅ ᐃᓗᐊᖅᓯᕚᓪᓕᕐᓇᖅᓱᓂᓗ. ᓱᖏᐅᑎᕙᓪᓕᐊᕙᒃᑲᑦᑕ ᖃᐅᑕᒫᑦ ᐊᑐᖅᐸᒃᑕᑦᑎᓐᓂᒃ. ᓄᑖᒥᒃ ᐊᑐᖅᓯᕙᓪᓕᐊᓂᖅ ᐃᒪᓐᓇᐅᒐᔪᒃᐸᒃᐳᖅ, ᐱᓇᓱᐊᕈᓯᕐᓄᑦ ᐱᖓᓱᓄᑦ ᑲᔪᓰᓐᓇᕐᓗᓂ ᐊᔪᕈᓐᓃᖅᓴᕐᓂᕐᒥᒃ ᓄᑖᒥᒃ ᐱᓕᕆᐊᒃᓴᒥᒃ.
ᐃᓕᖕᓂᒃ ᐱᕙᒌᔭᖅᓯᒪᓗᑎᑦ ᐊᓯᔾᔨᕐᓂᕆᔭᐅᔪᒧᑦ
ᖃᓄᕐᓕ ᐃᓕᖕᓂᒃ ᐊᑲᐅᓯᕚᓪᓕᖅᑎᑦᑎᔪᓐᓇᖅᐱᑦ ᐊᓯᔾᔨᕐᓂᐅᔪᓄᑦ ᓄᑖᒧᑦ ᐃᖅᑲᓇᐃᔮᕐᓄᑦ ᓴᖅᑭᓐᓂᐊᖅᑕᕐᓄᑦ?
ᖃᓄᐃᓕᐅᕋᔭᖅᐱᑦ?
- ᐊᐅᓚᑦᑎᔨᒋᔭᐃᑦ ᑎᑎᕋᖅᑎᓪᓗᒍ ᑲᒪᒋᔭᕆᐊᖃᖅᑕᕐᓂᒃ ᐊᔪᕐᓇᙱᓐᓂᖅᓴᐅᖁᓪᓗᒋᑦ ᐃᖅᑲᐅᒪᔭᕆᐊᒃᓴᖅ.
- ᐅᖃᓕᒫᕐᓗᒍ ‘ᐅᓂᒃᑳᕆᔭᑦ’ ᐃᓕᖕᓄᑦ ᐃᖅᑲᐃᓯᔾᔪᑎᒋᓂᐊᕐᓗᒍ ᐃᖅᑲᓇᐃᔮᕐᓂᒃ ᐱᓕᕆᔪᓐᓇᑦᑎᐊᕐᓂᕐᓂᒃ.
- ᐅᖃᖃᑎᖃᕐᓗᑎᑦ ᐃᖅᑲᓇᐃᔭᖃᑎᖕᓂᑦ ᐊᐅᓚᑦᑎᔨᒥᒡᓘᓐᓃᑦ ᐊᓯᐊᓂᑦ ᐱᓕᕆᕝᕕᖕᒥᑦ ᐅᖃᐅᔾᔪᖅᑕᐅᔪᒪᓗᑎᑦ ᑐᓴᐅᒪᖃᑎᖃᖕᓂᖕᒥᑦ ᓂᐅᕕᖅᐸᒃᑐᓂᑦ.
- ᐱᓕᕆᖃᑎᒋᕙᒡᓗᒋᑦ ᐱᓕᕆᖃᑎᒋᕙᒃᑕᑎᑦ ᐅᔾᔨᕆᓗᒋᓪᓗ ᖃᓄᖅ ᐃᓅᖃᑎᖃᖅᐸᖕᓂᖏᓐᓂᒃ ᐃᖅᑲᓇᐃᔭᕐᕕᒋᔭᕐᓂ.
- ᖃᐅᔨᒪᓂᐊᖅᐳᑎᑦ ᐋᖅᑭᒋᐊᕆᐊᖃᑐᐃᓐᓇᕆᐊᖃᖅᑕᐃᑦ ᐱᕕᒃᓴᕆᔭᐃᑦ.
- ᐊᓯᔾᔨᕐᓗᒍ ᓯᓂᒡᕕᒋᓂᐊᖅᑕᐃᑦ ᐃᖅᑯᒻᒪᖅᓴᕋᐃᓐᓂᖅᓴᐅᓂᐊᕋᕕᑦ ᐅᓪᓛᕈᒻᒥᓴᕐᓇᖅᓯᓗᑎᓪᓗ.
- ᐳᐃᒍᖅᑕᐃᓕᒋᑦ ᓴᓗᒻᒪᖅᓴᐃᓂᖅ ᑎᒥᒃᑯᑦ ᐊᒃᓱᕉᑕᐅᔭᕆᐊᖃᕐᒪᑦ ᐃᓇᖐᔾᔪᑕᐅᔪᓐᓇᖅᓱᓂᓗ ᐃᖃᐃᓕᓴᕈᑎᒋᔭᕐᓄᑦ.
- ᕿᓂᖅᐸᒡᓗᑎᑦ ᓈᒻᒪᒃᑐᒥᒃ ᐱᕕᒃᓴᒥᒃ ᐃᖃᐃᓕᓴᕐᓂᐊᕐᓗᑎᑦ ᐃᖅᑲᓇᐃᔭᕐᓇᐅᔪᓐᓃᕌᖓᑦ, ᑕᖃᓯᒪᓗᐊᙱᑐᐊᕈᕕᑦ!
ᐊᓯᔾᔨᕐᓂᖅ ᑕᐃᒪᐃᒐᔪᒃᐳᖅ ᐃᖅᑲᓇᐃᔮᒥ. ᐱᒋᐊᓕᖅᑎᓪᓗᒍ, ᐊᔪᕐᓇᖅᑰᔨᓇᔭᖅᑐᖅ, ᑭᓯᐊᓂ ᖃᖓᙳᖅᐸᓪᓕᐊᑎᓪᓗᒍ ᐊᔪᕈᓐᓃᖅᓴᖅᐸᒡᓗᒍᓗ, ᐊᐅᓚᑦᑐᓐᓇᑦᑎᐊᖅᑕᐃᑦ. ᐊᑐᓕᕐᓂᖅ ᓄᑖᓂᒃ ᐊᑐᖅᐸᒃᑕᕐᓂᒃ, ᐃᑲᔪᖅᑕᐅᔪᒪᓂᖅ ᐱᔭᕆᐊᖃᕌᖓᑦ, ᐃᓕᖕᓂᒡᓗ ᑲᒪᒋᑦᑎᐊᕐᓂᖅ ᐊᔪᕐᓇᙱᓐᓂᖅᓴᐅᔪᓐᓇᖅᐳᖅ ᓱᖏᐅᑎᕙᓪᓕᐊᓂᕐᒥᒃ. ᐊᑐᓂ ᐊᓯᔾᔨᕐᓂᐅᔪᑦ ᐱᕕᒃᓴᖃᖅᑎᑦᑎᕙᒃᐳᑦ ᐱᕙᓪᓕᐊᑎᑦᑎᓂᕐᒥᒃ ᐊᒻᒪ ᐱᔪᓐᓇᖅᓯᓂᕐᒥᒃ ᓄᑖᓂᒃ ᐊᔪᕈᓐᓃᖅᑕᐅᕙᒃᑐᓂᒃ.
ᕿᓄᐃᓵᕐᓗᑎᑦ, ᐱᕕᖃᖅᑎᓪᓗᑎᑦ ᓱᖏᐅᑎᓇᓱᒡᓗᑎᑦ, ᐃᖅᑲᐅᒪᓗᑎᓪᓗ ᑕᒪᓐᓇ ᑲᒪᒋᔪᓐᓇᕋᕕᐅᒃ!