ᐃᖅᑲᓇᐃᔮᒃᓴᖅᓯᐅᖅᑎᒧᑦ ᒪᓕᒃᑕᐅᕙᓪᓕᐊᕙᒃᑐᖅ: ᐱᕙᒌᔭᕐᓂᖅ ᐃᖅᑲᓇᐃᔮᒃᓴᒧᑦ ᐊᐱᖅᓱᖅᑕᐅᓂᕐᒧᑦ
ᐅᖄᓚᕕᐅᓚᐅᖅᐳᑎᑦ ᑲᒻᐸᓂᒋᔭᐅᔪᒥᑦ ᐊᐱᖅᓱᖅᑕᐅᔪᒪᓪᓗᑎᑦ. ᒫᓐᓇ ᐱᕙᒌᔭᕆᐊᖃᓕᖅᐳᒍᑦ! ᑖᓐᓇ ᐱᕕᒃᓴᕆᓕᖅᐸᐃᑦ ᑕᑯᒃᓴᐅᑎᑦᑎᓂᕐᒥᒃ ᐊᔪᙱᓐᓂᕆᔭᕐᓂᒃ ᑕᑯᑎᑦᑎᓗᑎᓪᓗ ᐱᔪᒥᓇᓛᖑᓂᕐᓂᒃ ᐱᓇᔪᒃᑐᒥᒃ ᑖᔅᓱᒧᖓ ᐃᓂᒧᑦ. ᐱᕙᒌᔭᖅᓯᒪᑦᑎᐊᕐᓂᖅ ᖁᓱᙱᓐᓂᖅᓴᐅᓕᕈᓐᓇᖅᐳᑎᑦ ᐱᑐᐃᓐᓇᕆᐊᖃᓕᕐᓗᑎᓪᓗ.
ᐃᖅᑲᓇᐃᔮᒃᓴᒧᑦ ᐊᐱᖅᓱᖅᑕᐅᓃᑦ ᖃᓄᐃᑦᑑᓂᖏᑦ
ᐊᔾᔨᒌᙱᑦᑑᑎᐅᕗᑦ ᐃᖅᑲᓇᐃᔮᒃᓴᒧᑦ ᐊᐱᖅᓱᕐᓂᐅᔪᑦ. ᖃᐅᔨᒪᓗᒋᑦ ᐃᑲᔪᕐᓂᐊᖅᑕᑎᑦ ᐱᕙᒌᔭᖅᓯᒪᓗᑎᑦ ᑭᓱᓄᑦ ᓂᕆᐅᒋᔭᖃᕐᓂᕐᒧᑦ:
- ᐅᐸᒍᑎᓯᒪᓗᓂ ᐊᐱᖅᓱᖅᑕᐅᓂᖅ − ᐅᐸᒡᓗᒍ ᐃᖅᑲᓇᐃᔭᖅᑎᑦᑎᔨᐅᑉ ᑎᑎᕋᕐᕕᖓ. ᓇᒧᙵᐅᕙᓪᓕᐊᓂᐊᕐᓂᕆᔭᐃᑦ ᐱᕙᒌᔭᖅᐸᒡᓗᒍ, ᐊᓐᓄᕌᑦᑎᐊᖅᐸᒡᓗᓯ, ᓇᒃᓴᖅᐸᒡᓗᓯᓗ ᐱᔭᐅᔭᕆᐊᓕᖕᓂᒃ ᑎᑎᕋᖅᓯᒪᔪᓂᒃ.
- ᖃᕆᑕᐅᔭᒃᑯᑦ/ᑕᕐᕆᔭᐅᑎᒃᑯᑦ ᐊᐱᖅᓱᕐᓂᖅ − ᐱᓕᕆᐊᖑᕙᒃᐳᖅ Zoom−ᑯᑦ, Teams−ᑯᑦ, ᐅᕝᕙᓘᓐᓃᑦ Google Meet−ᑯᑦ. ᐃᑭᐊᖅᑭᕕᒃᑰᕈᓐᓇᐅᑎᑦ ᑐᙵᑦᑎᐊᕋᓗᐊᕐᒪᖔᑦ ᖃᐅᔨᒋᐊᕐᓗᒍ, ᐊᔾᔨᓕᐅᕈᑎᑦ ᖃᓂᙳᕐᓇᐅᑎᓪᓗ ᖃᐅᔨᓴᕐᓗᒍ, ᓂᐱᑭᑦᑐᒥᒡᓗ ᓂᕈᐊᕐᓗᑎᑦ.
- ᐅᖄᓚᐅᑎᒃᑯᑦ ᐊᐱᖅᓱᕐᓂᖅ − ᕿᓚᒥᑯᓗᒃ ᐅᖄᓚᓗᑎᑦ ᖃᐅᔨᓇᓱᒡᓗᓂ ᓈᒻᒪᖕᒪᖔᖅᐱᑦ ᐊᐱᖅᓱᖅᑕᐅᒃᑲᓐᓂᓚᐅᙱᓐᓂᕐᓂ. ᐅᖃᓪᓚᑦᑎᐊᖅᐸᒡᓗᑎᑦ ᑎᑎᕋᖅᐸᓪᓕᐊᔭᑎᓪᓗ ᐱᓯᒪᕙᒡᓗᒋᑦ.
ᑕᒪᔾᔭ ᐊᑐᖅᑕᐅᒐᔪᒃᐸᒃᑐᑦ ᐊᐱᖅᓱᕐᓂᕆᔭᐅᕙᒃᑐᑦ. ᖃᓄᐃᑦᑐᑐᐃᓐᓇᕐᒥᒃ ᐊᐱᖅᓱᖅᑕᐅᓂᐊᕋᓗᐊᕈᕕᑦ, ᐱᒻᒪᕆᐅᕗᖅ ᐋᖅᑭᒃᓯᒪᓂᖓ ᐃᓕᖕᓄᑦ ᓈᒻᒪᒋᒍᕕᐅᒃ. ᐃᓱᕐᕆᓂᖅᓴᐅᒍᕕᑦ, ᐊᔪᕐᓇᙱᓐᓂᖅᓴᐅᓇᔭᖅᐳᖅ ᑕᑯᒃᓴᐅᑎᑦᑎᓂᕐᒥᒃ ᓴᙱᓂᕆᔭᕐᓂᒃ!
ᐱᕙᒌᔭᕐᓂᕐᒧᑦ ᐊᑐᒐᒃᓴᑦ
ᐊᐱᖅᓱᖅᑕᐅᑦᑎᐊᕈᒪᒍᕕᑦ, ᐅᑯᐊ ᐱᒻᒪᕆᐅᔪᑦ ᑲᒪᒋᑦᑎᐊᕐᓗᒋᑦ.
1. ᑐᑭᓯᐅᒪᓗᒋᑦ ᐃᓗᓕᖏᑦ
- ᓇᓗᓇᐃᕐᓗᒍ ᐅᓪᓗᖓ, ᖃᔅᓯᒧᐊᖅᐸᑦ, ᓇᓃᓐᓂᖓᓗ (ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᑲᑎᒪᓂᕐᒧᑦ ᐊᑦᑕᑕᕐᕕᒃᓴᖅ ᖃᕆᓴᐅᔭᒃᑯᑦ ᐊᐱᖅᓱᕐᓂᐊᕐᓗᓂ).
- ᖃᐅᔨᒋᐊᕐᓗᒍ ᑲᒻᐸᓂᐅᔪᖅ ᐊᒻᒪ ᐃᖅᑲᓇᐃᔮᖅ ᑐᑭᓯᑦᑎᐊᕋᓱᒡᓗᑎᑦ ᐱᓕᕆᐊᒃᓴᖏᓐᓂᒃ, ᐱᒻᒪᕆᐅᒋᔭᖏᓐᓂᒃ, ᐊᒻᒪ ᑭᓱᒥᒃ ᓂᕆᐅᒋᔭᖃᕐᒪᖔᑕ.
- ᖃᐅᔨᓴᕐᓗᒋᑦ ᐊᐱᖅᓱᖅᑎᑦ ᖃᐅᔨᒋᐊᕐᓗᒋᑦ LinkedIn−ᑯᑦ ᐅᕝᕙᓘᓐᓃᑦ ᑲᒻᐸᓂᐅᔫᑉ ᐃᑭᐊᖅᑭᕕᖓᓐᓂ.
- ᕿᓂᖅᐸᒡᓗᑎᑦ ᖃᓄᑐᐃᓐᓇᖅ ᑎᒥᒃᑯᑦ ᖃᓄᐃᔾᔪᑕᐅᕙᒃᑐᓂᒃ ᐊᔪᕐᓇᖅᑐᖅᓯᐅᕈᑕᐅᑐᐃᓐᓇᕆᐊᓕᖕᓂᒃ. ᖃᐅᔨᒪᑦᑎᐊᙱᒃᑯᕕᑦ, ᖃᐅᔨᒋᐊᕐᕕᒋᓗᒋᑦ ᐅᖄᓚᐅᑎᒃᑯᑦ, ᐃᕐᖐᓐᓈᖅᑕᐅᒃᑯᑦ, ᖃᕆᑕᐅᔭᒃᑯᓪᓘᓐᓃᑦ.
2. ᐱᕙᒌᔭᖅᐸᒡᓗᒋᑦ ᓇᒧᙵᐅᓂᐊᕐᓂᕆᔭᑎᑦ (ᐅᐸᒍᑎᓯᒪᓗᑎᑦ ᐊᐱᖅᓱᖅᑕᐅᓂᐊᕐᓗᑎᑦ)
- ᖃᐅᔨᒪᓗᒍ ᓇᒧᙵᐅᕙᓪᓕᐊᓂᕆᔭᐃᑦ ᐃᓕᖕᓂᒡᓗ ᐱᕕᒃᓴᖃᖅᑎᒃᑲᓐᓂᖅᐸᒡᓗᑎᑦ.
- ᖃᐅᔨᒋᐊᕐᓗᒍ ᓄᓇᓯᐅᑎᓄᑦ ᓄᖅᑲᖔᕐᕕᒃ ᐊᑐᐃᓐᓇᐅᖕᒪᖔᑦ ᐊᖁᒃᑯᕕᑦ.
- ᐃᓂᒃᓴᓕᐅᖅᐸᒡᓗᓯ, ᓲᕐᓗ ᐃᓯᕐᕕᐅᔪᓐᓇᖅᑐᓂᒃ.
3. ᐱᖁᑎᑦ ᓇᒃᓴᕆᐊᓖᑦ
- ᐃᖅᑲᓇᐃᔮᕆᖃᑦᑕᖅᓯᒪᔭᑎᑦ ᑎᑎᕋᖅᓯᒪᔪᑦ (ᖃᕆᓴᐅᔭᒃᑯᑦ ᓇᒃᓯᐅᔾᔭᐅᒐᓗᐊᖅᐸᑕ).
- ᑎᑎᕋᐅᑎᒥᒃ ᑎᑎᕋᕐᕕᒃᓴᒥᒡᓗ ᑎᑎᕋᖅᐸᓪᓕᐊᓂᐊᕐᓗᓂ.
- ᑎᑎᕋᖅᓯᒪᔪᓂᒃ ᖃᐅᔨᒋᐊᕐᕕᒃᓴᓂᒃ ᑐᒃᓯᕋᖅᐸᑕ.
- ᐱᑎᑦᑎᔪᖃᕐᓗᓂ ᖃᓄᐃᓕᐅᖃᑦᑕᖅᓯᒪᓂᕐᒧᑦ ᐱᓕᕆᐊᖑᓯᒪᔪᓂᒡᓘᓐᓃᑦ ᐊᑐᖅᑕᐅᔪᓐᓇᖅᑐᓂᒃ ᑕᐃᒪᐃᑦᑕᕆᐊᖃᖅᐸᑦ.
- ᐃᒪᖃᐅᑎᒥᒃ ᒥᑭᑦᑐᓂᒡᓗ ᐊᑐᖅᑕᐅᔭᕆᐊᖃᖅᐸᒃᑐᓂᒃ, ᓲᕐᓗ ᐊᒡᒐᓄᑦ ᖁᐱᕐᕈᐃᔭᐅᑎᓂᒃ ᑲᒃᑭᐅᑎᒃᓴᓂᒡᓗ.
4. ᑭᓱᓂᒃ ᐊᑐᕆᐊᖃᕐᒪᖔᑦ
- ᐊᓐᓄᕌᖅᓯᒪᑦᑎᐊᕐᓗᓂ, ᐱᓕᕆᓗᓂ ᐊᓐᓄᕌᖅᓯᒪᓗᓂ, ᐅᕝᕙᓘᓐᓃᑦ ᐊᑐᖅᑕᐅᒐᔪᒃᑐᖅ ᐊᓐᓄᕌᑦ.
- ᓂᕈᐊᖅᐸᒡᓗᑎᑦ ᐊᓐᓄᕌᓂᒃ ᓴᓗᒪᔪᓂᒃ, ᐱᓕᕆᔨᓪᓚᕆᐅᔪᓐᓇᖅᑐᓂᒃ, ᓈᒻᒪᑦᑎᐊᖅᑐᓂᒃᓗ.
- ᐅᓚᕕᓴᖅᑕᐅᕙᙱᓪᓗᑎᑦ ᐊᒻᒪ ᐊᓐᓄᕌᑦ ᓈᒻᒪᙱᑦᑐᖅ ᐃᖅᑲᓇᐃᔭᕐᕕᖕᒧᑦ.
- ᓯᓚ ᖃᓄᐃᓐᓂᐊᕐᓂᖓ ᑕᑯᒋᐊᕐᓗᒍ ᐃᓱᕐᕆᑦᑎᐊᖁᓪᓗᑎᑦ ᓇᒧᙵᐅᕙᓪᓕᐊᑎᓪᓗᑎᑦ ᐊᒻᒪ ᐃᓯᖅᓯᒪᓕᕈᕕᑦ ᐊᐱᖅᓱᖅᑕᐅᓂᐊᖅᑎᓪᓗᑎᑦ.
5. ᐃᓕᖕᓂᒃ ᐱᕙᒌᔭᖅᓯᒪᓗᑎᑦ ᐃᓱᒪᒃᑯᑦ ᐃᒃᐱᖕᓂᐊᓂᒃᑯᓪᓗ
- ᐃᒃᐱᒋᔭᑎᑦ ᓇᓗᓇᐃᕐᓗᒋᑦ. ᖁᒃᓴᓱᖕᓂᖅ ᖃᓄᐃᙱᑦᑐᖅ, ᐃᓱᒫᓗᙱᓪᓗᑎᑦ!
- ᐆᒃᑐᕐᓗᑎᑦ ᐊᑐᖅᑕᐅᔪᓐᓇᖅᑐᓂᒃ ᓲᕐᓗ ᐊᓂᖅᓵᖅᑐᕐᔪᐊᖅᐸᒡᓗᑎᑦ ᑕᐅᑐᙳᐊᖅᐸᒡᓗᑎᓪᓗ ᑲᔪᓯᓂᖃᑦᑎᐊᖅᑐᒥᒃ ᐊᐱᖅᓱᖅᑕᐅᓂᕐᒥᒃ.
- ᐱᕙᒌᔭᕆᑦ. ᐃᖅᑲᓇᐃᔮᑉ ᓇᓗᓇᐃᔭᖅᓯᒪᓂᖓ ᐊᒥᓱᐃᖅᑕᕐᓗᒍ ᕿᒥᕐᕈᓗᒍ.
- ᐊᔪᕈᓐᓃᖅᓴᖅᐸᒡᓗᒋᑦ ᐊᐱᖅᓱᖅᑕᐅᓂᕐᒧᑦ ᐊᐱᖅᑯᑕᐅᒐᔪᒃᑐᑦ ᐅᕝᕙᓘᓐᓃᑦ ᕿᓂᖅᐸᒡᓗᒋᑦ ᑭᐅᔾᔪᑕᐅᔪᑦ ᐊᐱᖅᑯᑎᓄᑦ ᐊᐱᖅᓱᖅᑎᐅᑉ ᐊᐱᖅᑯᑎᒋᑐᐃᓐᓇᕆᐊᖃᖅᑕᖏᓐᓄᑦ.
- ᐃᖅᑲᐅᒪᐃᓐᓇᐅᔭᕆᑦ ᐃᑲᔪᖅᑕᐅᔪᒪᔪᓐᓇᕐᓂᕐᓂᒃ.
- ᐊᑐᕐᓗᒍ STAR ᐱᓕᕆᔾᔪᑎ (ᖃᓄᐃᓕᖓᓂᖅ, ᐱᓕᕆᐊᒃᓴᖅ, ᖃᓄᐃᓕᐅᕐᓂᖅ, ᓴᖅᑭᑦᑐᖅ) ᐋᖅᑭᒃᓱᕐᓗᒋᑦ ᑭᐅᔾᔪᑎᑎᑦ.
- ᐊᔪᕈᓐᓃᖅᓴᖅᐸᒡᓗᑎᑦ ᐊᐱᖅᓱᖅᑕᐅᙳᐊᕐᓗᑎᑦ ᐱᖃᓐᓇᕆᔭᕐᓄᑦ ᐱᔭᕆᐅᖅᓴᑎᑦᑎᔪᒧᓪᓘᓐᓃᑦ, ᐅᕝᕙᓘᓐᓃᑦ ᐊᔪᕈᓐᓃᖅᓴᖅᐸᒡᓗᒋᑦ ᐃᓱᒪᒃᑯᑦ (ᓂᐱᖅᑯᖅᑐᓗᑎᒡᓘᓐᓃᑦ) ᑭᓯᐊᓂ ᓈᒻᒪᒃᓯᓕᖅᐸᑕ.
6. ᓇᓗᓇᐃᖅᐸᒡᓗᒋᑦ ᐱᓕᕆᔾᔪᑎᑎᑦ (ᑕᒪᓐᓇ ᐊᑐᖅᐳᖅ ᑕᕐᕆᔭᐅᑎᒃᑯᑦ ᐊᐱᖅᓱᕐᓂᕐᓄᑦ)
- ᖃᐅᔨᒋᐊᕐᓗᒍ ᐃᑭᐊᖅᑭᕕᒃᑰᕈᓐᓇᐅᑎᑦ, ᐊᔾᔨᓕᐅᕈᑎᑦ, ᐊᒻᒪ ᖃᓂᙳᕐᓇᐅᑎᑦ.
- ᖃᐅᒪᔪᒥ ᓂᐱᑭᑦᑐᒥᓗ ᐃᓂᖃᕐᓗᑎᑦ ᐊᐱᖅᓱᖅᑕᐅᓂᐊᖅᑎᓪᓗᑎᑦ.
- ᐃᓕᓐᓂᐊᕆᑦ ᖃᓄᖅ ᐊᑐᕈᓐᓇᕐᒪᖔᑦ ᑕᕐᕆᔭᐅᑎᒃᑯᑦ ᑐᙵᕕᐅᑉ ᐃᓗᓕᖏᓐᓂᒃ ᓲᕐᓗ ᓂᐱᖃᕈᓐᓃᖅᑎᑦᑎᓂᖅ, ᐃᒐᓛᒃᑯᑦ ᐊᒥᖅᑳᖃᑎᖃᕐᓂᖅ, ᐊᒻᒪ ᐅᖃᓪᓚᖃᑎᖃᕐᓂᖅ.
- ᐊᑐᕐᓗᑎᑦ ᐱᓕᕆᔨᓪᓚᕆᖕᒥᒃ ᐊᕙᓗᒥᐅᑕᕐᓂᒃ ᐅᕝᕙᓘᓐᓃᑦ ᐊᕙᑎᒋᔭᐃᑦ ᑕᑯᒃᓴᐅᔪᓐᓃᖅᑎᑉᐸᒡᓗᒍ ᑕᐃᒪᐃᑦᑕᕆᐊᖃᕈᕕᑦ.
7. ᐊᐱᕆᓗᑎᑦ ᐃᓂᖃᖅᑎᑕᐅᔪᒪᓗᑎᑦ (ᐱᔭᕆᐊᖃᖅᐸᑦ)
- ᐊᐱᕆᓗᑎᑦ ᐃᓂᒋᔭᕆᐊᖃᖅᑕᕐᓂᒃ ᓈᒻᒪᒃᑐᓂᒃ ᐱᔪᓐᓇᖅᓯᑐᐊᕈᕕᑦ. ᐱᐅᓛᖑᕗᖅ ᑎᑎᕋᖅᐸᒡᓗᑎᑦ ᑐᒃᓯᕋᓕᕌᖓᕕᑦ ᑭᓱᑐᐃᓐᓇᓂᒃ ᐳᐃᒍᖅᑕᐃᓕᓂᐊᕋᕕᑦ.
- ᐃᖅᑲᓇᐃᔭᕐᕖᑦ ᐃᓂᖃᖅᑎᑦᑎᔭᕆᐊᖃᖅᐳᑦ; ᐃᓱᒪᖅᓱᕆᑦ ᑐᒃᓯᕋᕐᕕᒋᔪᒪᒍᕕᒋᑦ.
- ᐃᑲᔪᖅᑕᐅᔭᕆᐊᓕᖕᓄᑦ ᐊᐅᓚᑦᑎᔨ ᐃᓕᖕᓂᒃ ᐱᖃᑎᖃᖁᒍᕕᐅᒃ, ᖃᐅᔨᒪᒋᐊᕐᓗᑎᑦ ᐱᓕᕆᐊᒃᓴᓕᕆᔨᑦ ᐊᑐᐃᓐᓇᐅᒐᓗᐊᕐᒪᖔᑦ ᐅᓪᓗᖓᓂ ᖃᔅᓯᒧᐊᖅᐸᓪᓗ ᐊᐱᖅᓱᖅᑕᐅᓂᐊᖅᑎᓪᓗᒋᑦ.
- ᐃᖅᑲᐅᒪᓂᐊᖅᐳᑎᑦ ᓈᒻᒪᒃᑐᑦ ᐃᓂᖃᖅᑎᑕᐅᓃᑦ ᖁᓱᙱᓐᓂᖅᓴᐅᓕᕈᓐᓇᕋᕕᑦ ᐃᑲᔪᕐᓗᑎᓪᓗ ᑲᔪᓯᑦᑎᐊᕈᓐᓇᕐᓂᕐᓂᒃ ᐊᐱᖅᓱᖅᑕᐅᓂᕐᓄᑦ. ᐃᓕᖕᓂᒃ ᓴᙱᓂᖅᑖᖅᑎᑦᑎᔪᓐᓇᖅᐳᑦ.
ᑭᖑᓪᓕᖅᐹᑦ ᐊᑐᖅᑕᐅᔪᒃᓴᑦ ᐊᐱᖅᓱᖅᑕᐅᓚᐅᙱᓐᓂᕐᓂ!
ᐅᕝᕙᐅᑯᐊ ᐱᔭᕇᖅᓯᒪᔭᕆᐊᓕᓐᓄᑦ ᓇᓗᓇᐃᔭᐃᓯᒪᔪᑦ ᐊᐱᖅᓱᖅᑕᐅᓚᐅᙱᓐᓂᕐᓂ ᖃᐅᔨᒪᑦᑎᐊᕈᒪᓂᕐᒧᑦ ᑭᓱᓕᒫᑦ ᐱᓕᕆᐊᕆᒐᓗᐊᕐᒪᖔᖅᐱᒋᑦ:
- ᐃᖅᑲᓇᐃᔮᕆᖃᑦᑕᖅᓯᒪᔭᑎᑦ ᕿᒥᕐᕈᓗᒋᑦ ᐊᒻᒪ ᐃᖅᑲᓇᐃᔮᑉ ᓇᓗᓇᐃᔭᖅᓯᒪᓂᖓ.
- ᐱᕙᒌᖅᓯᒪᓗᑎᑦ ᑭᐅᔾᔪᑕᐅᔪᓄᑦ ᐊᐱᖅᓱᖅᑕᐅᓂᕐᒧᑦ ᐊᐱᖅᑯᑎᓄᑦ.
- ᐃᓕᑦᑎᓗᑎᑦ ᑲᒻᐸᓂᐅᑉ ᒥᒃᓵᓄᑦ ᐊᒻᒪ ᐃᖅᑲᓇᐃᔮᒥᒃ.
- ᐃᓱᒪᓕᐅᕆᓗᑎᑦ ᐊᓐᓄᕌᕆᓂᐊᖅᑕᕐᓂᒃ ᑭᓱᓂᒡᓗ ᓇᒃᓴᕐᓂᐊᕐᒪᖔᖅᐱᑦ.
- ᓇᓗᓇᐃᕐᓗᒍ ᐊᐱᖅᓱᕐᓇᖅ ᖃᖓ ᓇᓃᓐᓂᖓᓗ (ᖃᕆᑕᐅᔭᒃᑯᓪᓘᓐᓃᑦ ᑲᑎᒪᓂᕐᒧᑦ ᐊᑦᑕᑕᕐᕕᒃ).
- ᖃᐅᔨᒋᐊᕐᓗᒋᑦ ᐱᓕᕆᔾᔪᑎᑎᑦ ᖃᕆᑕᐅᔭᒃᑯᑦ/ᑕᕐᕆᔭᐅᑎᒃᑯᑦ ᐊᐱᖅᓱᕐᓂᐅᒃᐸᑦ.
- ᐊᐱᖅᓱᕐᓂᕆᔭᐃᑦ ᐊᔪᕈᓐᓃᖅᓴᖅᐸᒡᓗᒍ ᑭᓯᐊᓂ ᐃᓱᕐᕆᓕᕈᕕᑦ.
- ᐊᓂᖅᓵᖅᑐᕐᔪᐊᕆᑦ ᖁᓱᙱᑦᑎᐊᕐᓗᓯᓗ!
ᐱᒻᒪᕆᐅᓂᖓ ᐱᕙᒌᔭᖅᓯᒪᓂᖅ ᒥᑭᒡᓕᒋᐊᓚᐅᖅᓯᒪᙱᓪᓗᒍ. ᐱᕙᒌᔭᖅᓯᒪᑦᑎᐊᕐᓂᖅ ᐱᒻᒪᕆᐊᓘᕗᖅ ᑲᔪᓯᓂᖃᑦᑎᐊᖅᑐᒃᑯᑦ ᐃᖅᑲᓇᐃᔮᒃᓴᒧᑦ ᐊᐱᖅᓱᖅᑕᐅᓂᐊᕐᓗᓂ. ᑐᑭᓯᐅᒪᒍᕕᑦ ᖃᓄᐃᑦᑑᓂᖓᓂᒃ ᐊᐱᖅᓱᖅᑕᐅᓂᐊᕐᓂᕐᓂᒃ, ᐱᕙᒌᔭᖅᓯᒪᕙᒌᕐᓗᑎᑦ, ᐱᓕᕆᔾᔪᑎᖃᕐᓗᑎᓪᓗ, ᐊᐱᖅᓱᕐᓂᕆᔭᐃᑦ ᑲᒪᒋᔪᓐᓇᖅᑕᐃᑦ ᖁᓱᙱᑦᑎᐊᕐᓗᑎᑦ.
ᐃᖅᑲᐅᒪᓂᐊᖅᐳᑎᑦ, ᑖᓐᓇ ᐱᕕᒃᓴᕆᒐᕕᐅᒃ ᐅᔾᔨᕐᓇᖅᓯᓗᑎᑦ ᑕᑯᒃᓴᐅᑎᑦᑎᓗᑎᓪᓗ ᖃᓄᐃᒻᒪᑦ ᓂᕈᐊᕆᔭᐅᓛᖑᖕᒪᖔᖅᐱᑦ ᑖᔅᓱᒧᖓ ᐃᖅᑲᓇᐃᔮᒃᓴᒧᑦ. ᑲᔪᓯᑦᑎᐊᕐᓂᐊᖅᐳᓯ!