ᐃᓚᓕᐅᔾᔨᓯᒪᑦᑎᐊᕐᓗᓂ ᐊᐱᖅᓱᕐᓂᐊᕐᓗᓂ ᑎᑎᖅᑐᕆᐊᓕᑦ

ᖃᓄᖅ ᓴᖅᑭᑎᑦᑎᔪᓐᓇᖅᐱᑦ ᐃᓚᓕᐅᔾᔨᓯᒪᓗᓂ ᐊᐱᖅᓱᖅᑕᐅᓂᕐᒧᑦ ᐊᑐᖅᑕᐅᖃᑦᑕᕋᔭᖅᑐᒥᒃ

ᖃᓄᖅ ᐊᑐᕆᐊᖃᕐᒪᖔᑦ ᐊᑐᕐᓂᐊᕐᓗᓂ ᑖᔅᓱᒥᖓ ᑎᑎᖅᑲᒥᒃ

ᐊᑐᕐᓗᒍ ᑖᓐᓇ ᐱᔭᕇᖅᓯᒪᔭᕆᐊᓕᓐᓄᑦ ᓇᓗᓇᐃᔭᐃᓯᒪᔪᖅ ᐃᓚᖃᕐᓗᓂ ᐃᓚᓕᐅᔾᔨᓯᒪᑦᑎᐊᕐᓗᓂ ᐊᐱᖅᓱᖅᑕᐅᓂᕐᒧᑦ ᐊᐱᖅᑯᑎᒃᓴᓄᑦ ᐊᑐᖅᑕᐅᔪᓐᓇᖅᑐᖅ ᓇᓗᙱᑦᑎᐊᕈᒪᓂᕐᒧᑦ ᐊᐱᖅᓱᕐᓂᕆᔭᐃᑦ ᑐᙵᓱᒃᑎᑦᑎᒐᓗᐊᕐᒪᖔᑦ ᐱᓇᔪᒃᑐᓄᑦ ᐊᔾᔨᒌᙱᕈᓘᔭᖅᑐᓂᒃ ᓇᑭᙶᕈᓘᔭᖅᑐᓂᒃ.

ᒥᑭᑦᑐᒥᒃ ᐊᓯᔾᔨᖅᓯᔪᓐᓇᖅᐳᑎᑦ ᐊᐱᖅᓱᖅᑕᐅᓂᓕᒫᕐᓂ ᓇᓗᙱᑦᑎᐊᕈᒪᓂᕐᒧᑦ ᑕᒪᓐᓇ ᒪᓂᒪᑎᑕᐅᓂᖅᓴᐅᒐᓗᐊᕐᒪᖔᑦ ᑕᒪᐃᓐᓄᑦᑎᐊᖅ ᐱᓇᔪᒃᑐᓄᑦ, ᐃᓚᒋᔭᐅᓪᓗᑎᒃ ᑕᐃᒃᑯᐊ ᑎᒥᒥᒍᑦ ᐊᔪᕈᑎᓖᑦ.

ᐳᐃᒍᖅᑕᐃᓕᒋᑦ:

• ᐊᐱᕆᓗᒋᑦ ᐃᖅᑲᓇᐃᔮᖅᑖᕋᓱᐊᒃᑐᑦ ᐃᖅᑲᓇᐃᔮᒧᑦ ᐃᑲᔪᖅᑎᒥᓂᒃ ᓇᒃᓴᖁᓗᒋᑦ ᐊᐱᖅᓱᖅᑕᐅᓕᖅᐸᑕ.
• ᐃᓱᒪᒋᓗᒋᑦ ᐊᔾᔨᒌᙱᑦᑐᑦ ᐱᔭᐅᔭᕆᐊᓖᑦ ᐃᖅᑲᓇᐃᔮᖅᑖᕋᓱᐊᒃᑐᓕᒫᓄᑦ.
• ᑐᑭᓯᓇᑦᑎᐊᖅᑎᓪᓗᒍ ᐃᓂᖃᖅᑎᑕᐅᔪᑦ ᐊᑐᐃᓐᓇᐅᓂᖏᓐᓂᒃ ᐃᖅᑲᓇᐃᔮᖅᑖᕋᓱᐊᒃᑐᓕᒫᓄᑦ ᐊᐱᖅᓱᖅᑕᐅᓂᓕᒫᖏᓐᓂ.

ᐱᓕᕆᖃᑎᖃᕐᓂᖅ ᐃᖅᑲᓇᐃᔮᓄᑦ ᑲᔪᖏᖅᓴᐃᔨᒥᒃ

ᐃᖅᑲᓇᐃᔮᖅᑖᕋᓱᐊᒃᑐᑦ ᐃᑲᔪᖅᓱᖅᑕᐅᑎᓪᓗᒋᑦ ᐃᖅᑲᓇᐃᔮᒧᑦ ᐃᑲᔪᖅᑎᒧᑦ ᐆᒃᑑᑎᑦᑎᐊᕙᐅᕗᖅ ᐃᓚᓕᐅᔾᔨᓯᒪᑦᑎᐊᕐᓂᕐᒥᒃ ᐃᖅᑲᓇᐃᔮᒥᒃ. ᐃᖅᑲᓇᐃᔮᓄᑦ ᑲᔪᖏᖅᓴᐃᔨ ᐃᑲᔪᕈᓐᓇᖅᑐᖅ ᐃᖅᑲᓇᐃᔮᖅᑖᕋᓱᐊᖅᑐᓂᑦ ᐃᖅᑲᓇᐃᔭᖅᑎᓂᓪᓗ ᖃᖓᑐᐃᓐᓇᒃᑯᑦ ᐃᖅᑲᓇᐃᔮᖅᑖᕋᓱᐊᖅᑎᓪᓗᒋᑦ, ᐃᓚᒋᔭᐅᓗᓂ ᐊᐱᖅᓱᖅᑕᐅᓂᖅ. ᐃᖅᑲᓇᐃᔮᓄᑦ ᐊᔪᕈᓐᓃᖅᓴᖅᑎᑦᑎᔨᑦ ᐃᑲᔪᕈᓐᓇᖅᐳᑦ ᐱᓇᔪᒃᑐᓂᒃ ᐃᒪᓐᓇ:

1. ᐱᑐᐃᓐᓇᕆᐊᖃᓕᕐᓗᑎᑦ ᑭᐅᓂᐊᕐᓂᕐᒧᑦ ᐊᐱᖅᓱᖅᑕᐅᓂᕐᒧᑦ ᐊᐱᖅᑯᑎᓄᑦ.
2. ᑐᑭᓯᔪᒪᓗᑎᑦ ᐊᐱᖅᑯᑎ ᑐᑭᓯᓇᑦᑎᐊᙱᑉᐸᑦ ᑐᑭᓯᒋᐊᒃᑲᓐᓂᕈᒪᒍᕕᓪᓘᓐᓃᑦ.
3. ᑕᑕᑎᕆᐊᓖᑦ ᐱᐊᓂᒡᓗᒋᑦ ᑎᑎᖅᑲᓂᒡᓗ ᓇᒃᓴᕐᓗᑎᑦ ᓲᕐᓗ ᖃᐅᔨᒋᐊᕐᕕᐅᔪᓐᓇᖅᑐᑦ ᐊᐱᖅᓱᖅᑕᐅᓚᐅᖅᑐᓄᑦ.
4. ᐊᐅᓚᓪᓗᒋᑦ ᐱᓕᕆᔾᔪᑎᑦ ᐃᓗᓕᖏᓪᓗ ᐊᐱᖅᓱᖅᑕᐅᓂᐊᖅᑎᓪᓗᒋᑦ.

ᐃᖅᑲᓇᐃᔮᓄᑦ ᐃᑲᔪᖅᑎᑦ ᐃᓕᖕᓂᒃ ᐃᑲᔪᕈᓐᓇᕐᒥᔪᑦ, ᑐᑭᓯᐅᒪᑦᑎᐊᒃᑲᓐᓂᕐᓂᕐᒥᒃ ᖃᓄᖅ ᐃᑲᔪᖅᓱᐃᔪᓐᓇᕐᒪᖔᑦ ᐃᖅᑲᓇᐃᔭᖅᑎᓂᒃ ᐊᔾᔨᒌᙱᑦᑑᑎᓂᒃ ᐱᔭᕆᐊᖃᖅᑕᖏᓐᓂᒃ. ᐃᓕᖕᓂᒃ ᐃᑲᔪᕈᓐᓇᖅᑐᑦ ᐃᒪᓐᓇ:

1. ᐋᖅᑭᒋᐊᕐᓗᒋᑦ ᐊᐱᖅᓱᖅᑕᐅᓂᕐᒧᑦ ᐊᐱᖅᑯᑏᑦ ᐱᖁᓪᓗᒍ ᐃᓚᐅᑎᑦᑎᓂᖅ.
2. ᐊᐱᖅᓱᕐᓂᐅᑉ ᓱᒃᑲᓂᖓ ᐋᖅᑭᒋᐊᕐᓗᒍ ᐃᖅᑲᓇᐃᔮᖅᑖᕋᓱᐊᒃᑐᓕᒫᑦ ᑭᐅᑦᑎᐊᕈᓐᓇᖁᓪᓗᒋᑦ.
3. ᐋᖅᑭᒃᓱᕐᓗᒍ ᐊᐱᖅᓱᕐᓂᕐᒧᑦ ᐊᕙᑎᒋᔭᐃᑦ ᑐᙵᓇᕐᓂᖅᓴᐅᖁᓪᓗᒍ.
4. ᐋᖅᑭᒃᓯᔪᖃᕐᓗᓂ ᐊᔾᔨᒌᙱᕈᓘᔭᖅᑐᓂᒃ ᐃᓚᓕᐅᔾᔨᓯᒪᑦᑎᐊᖅᑐᓂᒡᓗ ᐊᐱᖅᓱᖅᑎᓂᒃ. 

ᖃᐅᔨᒋᐊᕐᕕᒋᓗᒋᑦ ᓄᓇᕗᒻᒥ ᑎᒥᒥᒍᑦ ᐊᔪᕈᑎᓕᖕᓄᑦ ᒪᑭᓐᓇᓱᐊᖅᑏᑦ ᑲᑐᔾᔨᖃᑎᒌᒃᑯᑦ ᐱᓕᕆᖃᑎᖃᖅᐸᓪᓕᐊᓕᕐᓗᑎᑦ ᐃᖅᑲᓇᐃᔮᓄᑦ ᐊᔪᕆᖅᓲᔾᔨᔨᒥᒃ.

ᐊᐱᖅᓱᖅᑕᐅᔭᖅᑐᕐᓗᓂ ᑎᑭᑉᐸᓪᓕᐊᓂᖅ

ᐃᓱᒪᒋᓗᒋᑦ ᖃᓄᖅ ᐃᓄᐃᑦ ᐊᔾᔨᒌᙱᑦᑑᑎᓂᒃ ᐊᔪᕈᑎᓖᑦ ᐃᓯᕈᓐᓇᕐᒪᖔᑕ ᐃᒡᓗᕐᔪᐊᔅᓯᓐᓄᑦ ᐊᐱᖅᓱᕐᕕᖕᒧᓪᓗ.

ᐱᑎᑦᑎᔪᖃᕐᓗᓂ ᑐᓴᖅᑕᐅᔪᒃᓴᓂᒃ ᓇᓂ ᐱᓇᔪᒃᑐᑦ ᓇᓂᓯᔪᓐᓇᕐᒪᖔᑕ ᐊᑐᖅᑕᐅᔪᓐᓇᖅᑐᓂᒃ ᓄᓇᓯᐅᑎᓄᑦ ᓄᖅᑲᖓᕝᕕᒃᓴᓂᒃ, ᐊᒻᒪᓗᑦᑕᐅᖅ ᒪᔪᕋᐅᑎᓄᑦ ᖁᒻᒧᐊᔫᒃᑯᓪᓘᓐᓃᑦ ᐃᓯᕈᓐᓇᕐᓂᕐᒥᒃ ᐃᒡᓗᕐᔪᐊᔅᓯᓐᓄᑦ. ᐊᓯᖏᑦ ᑎᒥᒃᑯᑦ ᐱᔾᔪᑕᐅᔪᑦ ᐃᓱᒪᒋᔭᐅᔭᕆᐊᖃᖅᑐᑦ ᐅᑯᐊᖑᕗᑦ ᓱᓪᓗᑯᑖᑉ ᓯᓕᖕᓂᖓ, ᒪᔪᕋᐅᑎᑦ ᓂᕈᐊᒐᒃᓴᑦ ᐊᑐᕆᐊᖃᑐᐃᓐᓇᕆᐊᖃᖅᑕᖏᑦ, ᐹᑦ, ᐊᒻᒪ ᐊᐱᖅᓱᕐᓂᕐᒧᑦ ᑭᐳ ᐃᒃᓯᕙᐅᑕᖏᓪᓗ.

ᐃᓚᓕᐅᔾᔨᔪᓐᓇᕐᒥᔪᑎᑦ ᓇᒧᙵᐅᔭᕆᐊᖃᕐᒪᖔᖅᐱᑦ ᓇᓃᓐᓂᕆᔭᕐᓄᑦ ᐊᒻᒪ ᓇᓗᓇᐃᖅᓯᒪᔪᑦ ᐃᓯᕈᓐᓇᕐᓂᕐᒧᑦ ᐊᑐᖅᑕᐅᕙᒃᑐᑦ ᑎᑎᕋᖅᓯᒪᔪᒥ ᐊᔪᕐᓇᙱᑦᑐᒃᑯᑦ ᐅᖃᐅᓯᒃᑯᑦ. ᐊᒥᖅᑳᖃᑎᖃᕐᓂᖅ ᐊᔾᔨᙳᐊᓂᒃ ᐅᓂᒃᑳᖅᓯᒪᔪᓂᒡᓘᓐᓃᑦ ᐃᓂᒥᒃ ᐃᑲᔫᑎᖃᕈᓐᓇᕆᕗᖅ ᖃᕋᓴᒃᑯᑦ ᐊᔾᔨᒌᙱᕈᓘᔭᖅᑐᓄᑦ ᐱᓇᔪᒃᑐᓄᑦ.

ᖃᐅᔨᓴᕐᓗᒋᑦ ᐃᖅᑲᓇᐃᔮᖅᑖᕋᓱᒃᑐᑦ ᐊᔪᙱᑕᖏᑦ ᓈᒻᒪᖕᓂᖏᓪᓗ

ᐱᕙᒌᔭᖅᓯᒪᓗᑎᑦ ᖃᐅᔨᓴᕐᓂᐊᕐᓗᑎᑦ ᐃᖅᑲᓇᐃᔮᖅᑖᕋᓱᐊᒃᑐ ᐊᔪᙱᓐᓂᖃᕐᒪᖔᑦ ᐃᖅᑲᓇᐃᔮᒃᓴᒧᑦ ᐊᐱᖅᓱᖅᑕᐅᕝᕕᒋᓂᐊᖅᑕᕐᓄᑦ. ᑕᐅᑐᒡᓗᑎᑦ ᐱᑐᐃᓐᓇᐅᙱᑦᑐᓂᒃ ᐱᓕᕆᐊᒃᓴᓂᒃ ᖃᐅᔨᓴᕐᓗᒍᓗ ᑖᓐᓇ ᐱᓇᔪᒃᑐᖅ ᐱᔭᕇᖅᓯᔪᓐᓇᕐᒪᖔᑦ ᐱᓕᕆᐊᒃᓴᓂᒃ. ᐅᔾᔨᕐᓇᖅᓯᑎᑦᑎᐊᕐᓗᒋᑦ ᐊᔪᙱᓐᓂᕆᔭᐅᔪᑦ ᑭᖑᓂᑦᑎᓐᓂ ᐱᓕᕆᖃᑦᑕᖅᓯᒪᓂᑰᙱᖔᕐᓗᑎᒃ. ᐃᓄᐃᑦ ᑎᒥᒥᒍᑦ ᐊᔪᕈᑎᓖᑦ ᑐᓗᖅᑕᕈᑎᖃᕐᓂᖅᓴᐅᒐᔪᒃᐳᑦ ᐃᖅᑲᓇᐃᔭᕐᓂᕐᒧᑦ ᐃᓄᓕᒫᓂᑦ. ᐅᕝᕙᐅᑯᐊ ᐃᓚᖏᑦ ᖃᓄᐃᓕᐅᕈᑎᒋᔪᓐᓇᖅᑕᑎᑦ:

1. ᐱᑎᑦᑎᓗᑎᒃ ᐊᐱᖅᓱᖅᑕᐅᓂᕐᒧᑦ ᐊᐱᖅᑯᑎᒃᓴᐃᑦ ᐱᓇᔪᒃᑐᓄᑦ ᓯᕗᓂᐊᒍᑦ.
2. ᐃᖅᑲᓇᐃᔮᖅᑖᕋᓱᐊᒃᑐᓕᒫᑦ ᐊᔾᔨᒌᓂᒃ ᐊᐱᕆᕙᒡᓗᒋᑦ.
3. ᐋᖅᑭᒋᐊᕐᓗᒋᑦ ᐊᐱᖅᓱᖅᑕᐅᓂᕐᒧᑦ ᐊᐱᖅᑯᑏᑦ ᐃᓚᓕᐅᔾᔨᓯᒪᓂᖅᓴᐅᖁᓪᓗᒋᑦ (ᐊᑐᕐᓗᒍ ᐃᓚᓕᐅᔾᔨᓯᒪᑦᑎᐊᕐᓂᖅ ᐊᐱᖅᓱᕐᓂᕐᒧᑦ ᐊᐱᖅᑯᑎᓄᑦ ᒪᓕᒃᑕᐅᔪᒃᓴᖅ ᐃᑲᔪᖅᑕᐅᓂᐊᕋᕕᑦ).
4. ᐊᐱᖅᓱᖅᐸᒡᓗᑎᑦ ᐱᒋᐊᕈᑎᖃᕐᓗᑎᑦ “ᖃᓄᖅ” ᐃᒪᓐᓇᐅᙱᖔᖅᑐᖅ, “ᑕᐃᒪᐃᒍᓐᓇᖅᑐᖅ.”
5. ᐱᑐᐃᓐᓇᕆᐊᖃᖅᐸᒡᓗᑎᑦ ᐊᐱᖅᓱᕈᓐᓇᕐᓂᕐᒥᒃ ᐊᔾᔨᒌᙱᑦᑐᑎᒍᑦ.
6. ᐃᖅᑲᓇᐃᔮᖅᑖᕋᓱᐊᒃᑐᑦ ᐱᕕᖃᖅᑎᑉᐸᒡᓗᒋᑦ ᑭᐅᓂᐊᕐᓗᑎᒃ.
7. ᐊᐱᖅᓱᖅᑕᐅᓂᖅ ᑐᙵᕕᖃᖅᑎᑕᐅᓗᓂ ᐃᖅᑲᓇᐃᔮᑉ ᓇᓗᓇᐃᔭᖅᓯᒪᓂᖓᓂᒃ ᓴᖅᑭᑎᑕᕐᓂᒃ. ᐅᖃᖅᑕᐃᓕᒋᑦ ᐃᖅᑲᓇᐃᔮᖅ ᐊᓯᔾᔨᕐᓂᕋᕐᓗᒍ ᐊᐱᖅᓱᖅᑕᐅᓚᐅᙱᓐᓂᖏᓐᓂᒃ, ᓇᓗᓕᕈᑕᐅᔪᓐᓇᕐᒪᑦ ᐱᓇᔪᒃᑐᓄᑦ ᐱᕙᒌᔭᖅᓯᒪᔪᓄᑦ.

ᐋᖅᑭᒃᓯᔪᖃᕐᓗᓂ ᓈᒻᒪᒃᑐᒥᒃ ᐃᓂᒥᒃ ᐊᐱᖅᓱᕐᓂᕐᒧᑦ ᐃᒡᓗᕈᓯᕐᒥᒃ ᐊᑐᖅᑕᐅᔪᓐᓇᖅᑐᒥᒃ

ᐊᔾᔨᒌᙱᑦᑐᑦ ᐃᖅᑲᓇᐃᔮᖅᑖᕋᓱᐊᒃᑐᑦ ᐊᔾᔨᒌᙱᑦᑐᓂᒃ ᐋᖅᑭᒃᓱᐃᔭᕆᐊᖃᑐᐃᓐᓇᕆᐊᓖᑦ ᐊᐱᖅᓱᖅᑕᐅᕝᕕᒃᓴᒧᑦ. ᐱᓇᔪᒃᑐᖅ ᐊᐱᕆᓯᒪᒃᐸᑦ ᓈᒻᒪᒃᑐᒥᒃ ᐃᓂᖃᖅᑎᑕᐅᔪᒪᓗᓂ, ᐱᑎᑦᑎᑦᑎᐊᕐᓂᐊᖅᐳᑎᑦ. ᐋᒃᑲᐅᒍᓂ, ᐃᒪᐃᓕᐅᕈᓐᓇᖅᐳᑎᑦ:

1. ᓂᕈᐊᕐᓗᑎᑦ ᓂᐱᑭᑦᑐᒥ ᐅᓚᕕᓴᖅᑕᐅᙱᓪᓗᓂ.
2. ᐃᓕᓯᓗᑎᑦ ‘ᐊᐱᖅᓱᖅᑕᐅᕙᓪᓕᐊᔪᖅ, ᐸᒡᕕᓵᕆᑦᑕᐃᓕᒋᑦ’ ᓇᓗᓇᐃᒃᑯᑕᕐᒥᒃ ᐹᒧᑦ.
3. ᐲᔭᕐᓗᒋᑦ ᐱᖁᑎᑦ ᐸᒡᕕᓵᕆᔪᑦ ᓂᐱᖅᑯᖅᑐᔪᑦ, ᓲᕐᓗ ᓯᕿᙳᔭᖅ ᐃᖏᕐᕋᔪᖅ ᐅᕝᕙᓘᓐᓃᑦ ᖃᐅᒻᒪᖅᑯᑏᑦ ᓂᐱᖅᑯᖅᑐᔪᑦ.
4. ᐋᖅᑭᒃᓱᕐᓗᒍ ᐃᒡᓗᕈᓯᖅ ᐱᕚᓪᓕᖅᑎᑦᑎᔪᒪᓂᕐᒧᑦ ᐅᖃᖃᑎᒌᖕᓂᕐᒥᒃ, ᐃᒃᓯᕚᙱᖔᕐᓗᑎᑦ ᓵᑉ ᐊᑭᑦᑎᐊᖓᓂ ᐊᐱᖅᓱᖅᑕᐅᔪᒧᑦ. 

ᐋᖅᑭᒋᐊᕐᓗᒋᑦ ᐱᕕᒃᓴᑦ

ᐃᓕᓴᕆᓗᒋᑦ ᐃᓄᐃᑦ ᑎᒥᒥᒍᑦ ᐊᔪᕈᑎᓖᑦ ᐱᕕᖃᒃᑲᓐᓂᕆᐊᖃᑐᐃᓐᓇᕆᐊᖃᕐᓂᖏᓐᓂᒃ ᐱᐊᓂᒃᓯᓇᓱᒡᓗᑎᒃ ᐱᓕᕆᐊᒃᓴᖏᓐᓂᒃ ᐊᓯᖏᑕ ᑕᐅᑐᒃᑐᒋᑦ. ᐃᑲᔪᕐᓗᒋᑦ ᐱᓇᔪᒃᑐᑦ ᑕᑯᒃᓴᐅᑎᑦᑎᓗᑎᒃ ᐊᔪᙱᓐᓂᕐᒥᓂᒃ ᐃᒪᐃᓕᐅᕐᓗᓂ:

1. ᕿᓚᒻᒥᐅᔪᒃᑯᑦ ᐊᑯᓂᐅᙱᑦᑐᒥᒡᓘᓐᓃᑦ ᐊᐱᖅᓱᑲᑕᙱᓪᓗᑎᑦ ᐅᕝᕙᓘᓐᓃᑦ ᑎᑎᕋᖁᙱᓪᓗᒋᑦ ᐊᔪᙱᓐᓂᕆᔭᖏᓐᓂᒃ ᐊᐱᖅᓱᖅᑕᐅᑎᓪᓗᒋᑦ, ᐊᒃᓱᕈᕐᓇᖅᓯᑎᑦᑎᔪᓐᓇᕐᒪᑕ.
2. ᐅᖓᕙᕆᐊᖅᓯᓂᖅ ᖃᖓᒃᑰᕋᔭᕐᓂᖏᓐᓂᒃ ᐃᓛᒃᑰᖅᑐᓄᑦ ᐊᐱᖅᓱᕐᓂᕆᔭᐅᕙᒃᑐᓄᑦ.
3. ᑕᑭᓪᓕᒋᐊᕐᓗᒋᑦ ᐊᑯᓐᓂᖏᑦ ᐊᐱᖅᓱᕐᓂᐅᔪᑦ.
4. ᐱᕕᒃᓴᖃᖅᑎᑦᑎᒃᑲᓐᓂᖅᐸᒡᓗᑎᑦ ᐅᕝᕙᓘᓐᓃᑦ ᐊᔪᙱᑕᖃᕐᓂᕐᒧᑦ ᖃᐅᔨᓴᖅᑕᐅᑎᑦᑎᑦᑕᐃᓕᒪᕙᒡᓗᑎᒃ ᑕᐃᒪᐃᑦᑕᕆᐊᖃᕌᖓᒥᒃ.